މާލޭގެ ގެޔަކަށް ފިރިހެނަކު ވައްދައި ބަރަހަނާކޮށް ބިރުދައްކައިގެން އޭނާގެ އަތުން ފޭރުނު މައްސަލައެއްގައި ތިން މީހެއްގެ މައްޗަށް ދައުވާ ކުުރުމަށް ފޮނުވައިފިއެވެ.
މި މައްސަލައިގައި ދައުވާ ކުރުމަށް ފޮނުވި ތިން މީހުންގެ ތެރޭގައި ހިމެނެނީ 2 ފިރިހެނުންނާއި އަންހެނެކެވެ.
މީހުންނަކީ، ޖުލައި މަހުގެ 24 ވަނަ ދުވަހުގެ ވަގުތެއްގައި މއ. މަސްފަން ގެއަށް ދިވެހި ފިރިހެނަކު ވައްދައި، އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކުރި މައްސަލައިގައި ހައްޔަރުކުރި މީހުންނެވެ.
މި މީހުން ވަނީ، އޭނާގެ މޯބައިލް ފޯނުއަތުލައި އޭނާގެ ބެންކު އެކައުންޓުން ފައިސާ ޓްރާންސްފާކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމްއިން ފައިސާ ނަގާފައިވާ ކަމަށް ތުހުމަތުކުރެވޭކަމަށް ފުލުހުން ވަނީ ބުނެފައެވެ.
މި މައްސަލައާއި ގުޅިގެން ހައްޔަރުކޮށްފައިވަނީ، މއ. މަސްފަން، ޢާއިޝަތު (43އ)، މއ. މަސްފަން، މުޙައްމަދު ރީހާން (27އ)، ސ. ހިތަދޫ / ސޯމާ، ޝަފީޤު އިބްރާހީމް (35އ) އެވެ.
ފުލުހުން ބުނީ، އެ މީހުންގެ މައްޗަށް ދައުވާކުރުމާ މެދު ގޮތެއް ނިންމައިދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވަނީ މި ސެޕްޓެންބަރު މަހުގެ 9 ވަނަ ދުވަހު ކަމަށެވެ.
އެ މައްސަލައާ ގުޅިގެން ކޯޓުއަމުރެއްގެ ދަށުން ތިން މީހުން ހައްޔަރުކޮށް، އެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން ބަންދުކުރުމަށް އަމުރުކޮށްފައިވާ ކަމަށް ފުލުހުން ބުނެއެވެ.
