ވައިގެ މަގުން ރާއްޖެއަށް މަސްތުވާތަކެތި އެތެރެކުރަން އުޅުނު މީހަކު ހައްޔަރުކޮށްފިއެވެ.
ފުލުހުން ބުނީ، ސެޕްޓެމްބަރު މަހުގެ 16 ވަނަ ދުވަހު ވައިގެ މަގުން ރާއްޖެއަށް މަސްތުވާތަކެތި އެތެރެކުރަން އުޅުނުކަމުގެ ތުހުމަތުގައި ދިވެހި ފިރިހެނެއް ވެލާނާ އިންޓަރނޭޝަނަލް އެއަރޕޯޓުން ހައްޔަރުކޮށްފައިވާކަމަށެވެ.
ހައްޔަރުކޮށްފައިވަނީ ސ ހިތަދޫ ސަމަންދަރު އުމުރުން 35 އަހަރުގެ އަހްމަދު އަހުސަނެވެ.
މީގެ އިތުރުން އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން އޭނާގެ ބަންދަށް 15 ދުވަސް އެ ކޯޓުން ޖަހައިފައިވާކަމަށްވެސް ފުލުހުން ވަނީ ބުނެފައެވެ.
މި މައްސަލަ އިތުރަށް ތަހުޤީގުކުރަމުން އަންނަކަމުގައިވެސް އެ އިދާރާއިން ވަނީ ބުނެފައެވެ.
