ހުސްވެފައިވާ ޕްރޮސިކިއުޓަރ ޖެނަރަލްގެ މަޤާމަށް ، ރައީސް އޮފީހުގެ ލީގަލް ސެކެޓްރީގެ މަޤާމުގައި ހުންނެވި އައްބާސް ޝަރީފް އައްޔަން ކުރައްވައި އެ މަޤާމުގެ ފަތްކޮޅު އެ ބޭފުޅާއަށް އަރުވައިފިއެވެ.
ރައީސް އޮފީހުގައި މިއަދު ހެނދުނު ބޭއްވި ރަސްމިއްޔާތެއްގައި އައްބާސަށް މަޤާމުގެ ފަތްކޮޅު ހަވާލުކޮށްދެއްވީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒެވެ.
އެ ބޭފުޅާއަށް މަގާމުގެ ހުވާ ލައިދެއްވީ އުއްތަމަފަނޑިޔާރު އަޙްމަދު މުޢުތަޞިމް ޢަދުނާނެވެ.
ޕީޖީގެ މަޤާމު ހުސްވީ ކުރިން އެ މަޤާމުގައި ހުންނެވި ހުސައިން ޝަމީމް އެ މަޤާމުން ވަކިކުރުމަށް މިދިޔަ މަހުގެ 22 ގައި ރައްޔިތުންގެ މަޖިލިހުން ފާސްކުރުމާއި ގުޅިގެންނެވެ.
އެގޮތުން އެ މަޤާމަށް ކުރިމަތިލުމަށް ރައީސް އޮފީހުން ހުޅުވާލި ފުރުސަތުގައި ޝައުޤުވެރިކަން ފާޅުކޮށް 6 ބޭފުޅަކު ކުރިމަތިލެއްވި އިރު، ރައީސް މުއިއްޒު، މަޖިލީހަށް ފޮނުއްވީ އައްބާސްގެ ނަންފުޅު އެކަންޏެވެ.
އައްބާސް އެ މަޤާމަށް އައްޔަން ކުރުމަށް މަޖިލިހުން ފާސްކޮށްފައި ވަނީ އިއްޔެ މަޖިލިހުގެ ދައުރުން ބޭރުން ބޭއްވި 3 ވަނަ ޖަލްސާގައި ނެގުނު ވޯޓުގައި ބައިވެރިވި 85 މެމްބަރުންގެ ތާއީދާއެކުގައެވެ.
އޭގެ ތެރޭގައި އެމްޑީޕީ މެމްބަރުންވެސް ހިމެނެއެވެ.
ގާނޫނުގައި އޮންނަ ގޮތުން ޕީޖީގެ މަގާމު ހުސްވާތާ 30 ދުވަހުގެ ތެރޭގައި އާ ޕީޖީއަކު އައްޔަންކުރަންޖެހޭނެއެވެ.
މީގެ ކުރިން ޖުޑިޝަރީ ކޮމިޓީގައި ވާހަކަދައްކަވަމުން އައްބާސް ވަނީ ޕީޖީކަމުގެ ޒިންމާތައް އަދާކުރެއްވުމުގައި އެއްވެސް މީހެއްގެ މޫނަށް ނުބައްލަވާނެ ކަމަށް ވިދާޅުވެފައެވެ.
