ދަަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ރާއްޖޭގެ ޓެކްސީ ގަވާއިދަށް އިސްލާހުތަކެއް ގެނެސްފިއެވެ.
މި އިސްލާހުތަކުގެ ދަށުން ޓެކްސީ ލައިސަންސް ދޫކުރުމަށް ދެ އައު ޝަރުތެއް ކަނޑައަޅާފައިވެއެވެ. އޭގެ ތެރެއިން ފުރަތަމަ ޝަރުތަކީ، ލައިސަންސަށް އެދޭ އުޅަނދަކީ ލައިސަންސް ލިބިފައިވާ ޓެކްސީ ސެންޓަރެއްގައި ލިސްޓްކޮށްފައިވާ އުޅަނދެއް ކަމުގައި ވާންޖެހުމެވެ.
ދެވަނަ ޝަރުތުގެ ގޮތުގައި، ލައިސަންސަށް އެދޭއިރު އެ އުޅަނދަކީ ޓެކްސީ ސެންޓަރެއްގައި ލިސްޓްކޮށްފައިވާ އުޅަނދެއްކަން އަންގައިދޭ ލިޔުމެއް ހުށަހަޅަންޖެހޭނެ ކަމަށް ބަޔާންކޮށްފައިވެއެވެ.
ވުޒާރާއިން މަޢުލޫމާތު ދީފައިވާ ގޮތުގައި، މި އިސްލާހުތަކަށް މިހާރުން ފެށިގެން ޢަމަލުކުރަން ފަށާފައިވެއެވެ. މި ބަދަލުތަކުގެ ސަބަބުން ޓެކްސީ ޚިދުމަތުގެ ފެންވަރު މަތިވެ، ޚިދުމަތް ބޭނުންކުރާ ފަރާތްތަކަށް އިތުރު ރައްކާތެރިކަމެއް ލިބިގެންދާނެ ކަމަށް ބެލެވެއެވެ.
