ރާއްޖޭން ޑީޕޯޓްކުރި ސްރީލަންކާ މީހަކު އިމިގްރޭޝަންގެ ނިންމުމާ ދެކޮޅަށް ސިވިލް ކޯޓަށް މައްސަލަ ހުށަހަޅައިފިއެވެ
ދިވެއްސަކާ ކައިވެނިކޮށްގެން އުޅުނު ތެންތެނީ ވަރެން ނަދިޝް ޕެރޭރާ ނަމަކަށް ކިޔާ މި މީހާ ރާއްޖޭން ޑީޕޯޓްކޮށްފައިވަނީ މިއަހަރުގެ މެއި މަހުގެ ތެރޭގައެވެ. އޭގެފަހުން ޓޫރިސްޓް ވިސާއެއްގައި ރާއްޖެ އެތެރެވާން މަސައްކަތްކުރުމުން، އޭނާ ރާއްޖެ އެތެރެވިޔަ ނުދީ ހިފަހައްޓައި އަނބުރާ ފޮނުވާލާފައިވެއެވެ.
ޕެރޭރާ ސިވިލް ކޯޓަށް ހުށަހަޅާފައިވަނީ ރާއްޖެ އެތެރެވިޔަ ނުދިނުމުގެ ނިންމުން ރިވިއުކުރުމަށް އެދި ޖުޑީޝަލް ރިވިއު މައްސަލައެކެވެ. އިމިގްރޭޝަނުން މި މައްސަލަ ސިވިލް ކޯޓުން ނުބެލޭނެކަމަށް ބުނެ އިއުތިރާޒުކުރި ނަމަވެސް، ކޯޓުން ވަނީ އެ އިއުތިރާޒު ބަލައިނުގަނެ ޝަރީއަތް ކުރިއަށް ގެންދިއުމަށް ނިންމާފައެވެ.
ޕެރޭރާގެ ފަރާތުން ބުނެފައިވަނީ، އޭނާ ޑީޕޯޓްކުރިއިރު އެއްވެސް ސަބަބެއް ބަޔާންކޮށްފައިނުވާ ކަމަށާއި، ވަކީލެއްގެ އެހީތެރިކަމަށް އެދެވިދާނެކަން އަންގާފައިނުވާ ކަމަށެވެ. މިއީ އަސާސީ ޙައްޤުތަކެއްކަމަށް ބުނެ، މި ޙައްޤުތައް ފޯރުކޮށްނުދީ އިމިގްރޭޝަނުން ނިންމި ނިންމުމަކީ ޤާނޫނާ ޚިލާފު ނިންމުމެއްކަމަށް ކަނޑައަޅައިދިނުމަށް އޭނާ ވަނީ ކޯޓުގައި އެދިފައެވެ.
މި މައްސަލަ ކުރިމަތިވެފައިވަނީ އިމިގްރޭޝަނުން ގަވާއިދާ ޚިލާފަށް އުޅޭ ބިދޭސީންނާ ދެކޮޅަށް ބޮޑު އޮޕަރޭޝަނެއް ހިންގަމުންދާ ދަނޑިވަޅެއްގައެވެ. މިހާތަނަށް 3,000 އަށްވުރެ ގިނަ ބިދޭސީން ޑީޕޯޓްކޮށްފައިވާއިރު، ބައެއް ބިދޭސީން ވަނީ މި އޮޕަރޭޝަނުން ސަލާމަތްވުމަށް އެކި ރަށްރަށަށް ފިލާފައެވެ.
