ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، އދ.ގެ 79 ވަނަ އާންމު މަޖިލީހުގައި ބައިވެރިވެވަޑައިގަތުމަށް މިރޭ ނިއުޔޯކަށް ފުރާވަޑައިގެންފިއެވެ.
ދަތުރުފުޅުގެ ކުރިން ދެއްވި އިންޓަވިއުއެއްގައި ރައީސް މުއިއްޒު ވިދާޅުވީ، ދިވެހިރާއްޖެއަށް އެންމެ ފައިދާ ކުރާނީ ބައިނަލްއަޤްވާމީ ދުނިޔެއާ ގުޅިލާމެހިގެން ކަމަށެވެ.
ރާއްޖޭގެ އިޤްތިޞާދީ ހާލަތު ދަތި މި ދަނޑިވަޅުގައި، މި ދަތުރުފުޅަކީ ވަރަށް މުހިންމު ފުރުޞަތެއްކަމަށް ރައީސް ފާހަގަކުރެއްވިއެވެ. އާންމު މަޖިލީހުގައި ރާއްޖެއަށް ބޭނުންވެފައިވާ މުހިންމު ކަންތައްތަކާ ބެހޭގޮތުން، ޚާއްޞަކޮށް ތިމާވެށި، ޓެކްނޮލޮޖީ އަދި ތަރައްޤީއާ ގުޅޭ މައުޟޫތަކަށް އަލިއަޅުވާލައްވާނެ ކަމަށް ވިދާޅުވިއެވެ.
“އެކިއެކި ބައްދަލުވުންތަކުގައި ރާއްޖޭގެ ބަސް އިއްވާނަން. ޤައުމަށް މުހިންމު ކަންކަމުގައި، ދިވެހިރާއްޖެއަށް އެންމެ ފައިދާ ވަނީ ބައިނަލްއަޤްވާމީ ދުނިޔެއާ ގުޅިލާމެހުނު ވަރަކަށް،” ރައީސް ވިދާޅުވިއެވެ.
އދ.ގެ އެކިއެކި ޖަމްޢިއްޔާތަކާއި އެކި ޤައުމުތަކުގެ އެހީތެރިކަން ހޯދުމަށް މި ދަތުރުފުޅު މުހިންމުކަމަށް ރައީސް ފާހަގަކުރެއްވިއެވެ. އަދި ރައްޔިތުންގެ ފަރާތުން ގިނަ ވާހަކަތަކެއް އެ މަޖިލީހުގައި ތަމްސީލު ކުރައްވާނެ ކަމަށާއި، މި ދަތުރުފުޅުގެ ފައިދާ ކުރިއަށް އޮތް ދުވަސްތަކުގައި ފެންނާނެ ކަމަށް ވިދާޅުވިއެވެ.
ރައީސް މުއިއްޒު އާންމު މަޖިލީހުގައި ތަޤުރީރުކުރައްވާނީ މި މަހުގެ 24 ވަނަ ދުވަހުއެވެ. މި ދަތުރުފުޅުގައި ސަމިޓް އޮފް ދަ ފިއުޗަރގައި ބައިވެރިވެވަޑައިގަތުމާއި، އެކި ޤައުމުތަކުގެ އިސްވެރިންނާ ބައްދަލުކުރެއްވުން ހިމެނެއެވެ. ރައީސް މުއިއްޒު އެނބުރި ރާއްޖެ ވަޑައިގަތުމަށް ހަމަޖެހިފައިވަނީ މި މަހުގެ 29 ވަނަ ދުވަހުއެވެ.
