ގިނަ ދުވަސް ވަންދެން މާލޭގެ މަގުތަކުގައި ބަހައްޓާފައި ހުރި 224 ސައިކަލެއް މާލެ ސިޓީ ކައުންސިލުގެ ބެލުމުގެ ދަށަށް ގެންގޮސްފިއެވެ.
މާލެ ސިޓީ ކައުންސިލުން މިއަދު އެކްސްގައި ކުރި ޕޯސްޓެއްގައި ބުނެފައި ވަނީ މާލޭގެ މަގުތަކުގައި ގިނަ ދުވަސްތަކެއް ވަންދެން ބަހައްޓާފައި ހުރި އުޅަނދުތައް އެކައުންސިލުން ނަގާފައި ވަނީ މާލޭގެ މަގުތައް ސާފުތާހިރުކޮށް ބޭއްވުމަށާއި ހިތްފަސޭހަ ތަނަކަށް ހެދުމަށް ކުރަމުންދާ މަސައްކަތުގެ ދަށުން ކައުންސިލާއި ފުލުހުން ގުޅިގެން ކަމަށެވެ.
އެގޮތުން މާލޭގެ މަގުތަކުގައި ހުރި ބޭނުން ނުކުރާތާ އެއް އަހަރަށް ވުރެ ގިނަ ދުވަސްވެފައި ހުރި އުޅަނދުތައް އެބަހުރި ކަމަށާއި ބައެއް ސައިކަލްތަކުގައި އިންޖީނާއި މަޑި ވެސް ނުހުންނަކަމަށް ސިޓީ ކައުންސިލުގެ އޮފިޝަލަކާއި ހަވާލާދީ ރާއްޖޭގެ އޮންލައިން ނޫހެއްކަމަށްވާ ވަގުތު ނޫހުން ރިޕޯޓްކޮށްފައިވެއެވެ
“އިންޖީނު ނެތި ވެސް އެބަހުރި، ބައެއް ވެހިކަލްތަކުގެ ސާމާނު ވަގަށް ނެގުމުގެ ސަބަބުން މަގުމަތީގައި ބަހައްޓާފައި އެބަހުރި، ބައެއް މީހުން ފުރަފުރައިގެން ވެސް ގޮސްފައި އެބަހުރޭ ސައިކަލް މަގުމަތީގައި ބަހައްޓާފައި ޒޯން ތަކުގައި ނުދުއްވާ ވަރަށް ބައިވަރު ސައިކަލް ހުރި ކަމަށް ފާހަގަ ކުރެވިފައިވޭ،” ސިޓީ ކައުންސިލް
މިފަދައިން ނަގާފައިވާ އުޅަނދުތައް ޓޯކޮށް ނައްތާލުމުގެ ކުރިން ފުލުހުން އަމަލު ކުރާ އުޞޫލާއި އެއްގޮތަށް އިއުލާނު ކުރާނެ ކަމަށްވެސް މާލެ ސިޓީ ކައުންސިލުގެ އޮފިޝަލް ވިދާޅުވިއެވެ.
