ފެނަކައިން ކަސްޓަމަރުންނަށް ދެމުން އަންނަ ޚިދުމަތްތައް އިތުރަށް ލުއި ފަސޭހަކޮށް ކުންފުނި ޑިޖިޓަލައިޒް ކުރުމުގެ ގޮތުން އެ ކުންފުނިން ދެމުން އަންނަ ޚިދުމަތްތަކަށް އޮންލައިންކޮށް އެދެވޭ ގޮތަށް ހަދައިފިއެވެ.
މި ޚިދުމަތް ތަޢާރަފްކުރުމުގެ މަޤްސަދަކީ، އެ ކުންފުންޏަކީ އަސާސީ ގިނަ ހިދުމަތްތަކަކަށް ވަރަށް ގިނަ ރައްޔިތުން ބަރޯސާވާ ކުންފުންޏަކަށް ވުމުން، އެ ކުންފުނިން ދެމުން އަންނަ ޚިދުމަތްތަކުގެ ފެންވަރު ރަނގަޅު ކުރުން ކަމުގައި ފެނަކައިން ވިދަޅުވެއެވެ.
ފެނަކަ ޑިޖިޓަލްކުރުމުގެ މަގުޗާޓަކީ ފެނަކައިގެ ޚިދުމަތްތަކުގެ ފެންވަރު ރަނގަޅުކޮށް ކުރިއެރުންތަކެއް ގެނެސްދޭނެ ކަންކަމުގެ މައްޗަށް އެކުލެވޭ މަގުޗާޓެއް ކަމަން ފާހަގަކޮށް އެ ކުންފުނިން ވަނީ އެ މަގު ޗާޓުގެ ތެރެއިން ކުންފުނީގެ ޚިދުމަތްތަކަށް ބޭނުންވާ ޑޭޓާ ހިމެނޭ ސޮފްޓްވެއާ އަދި އެޗްއާރު ސިސްޓަމްގެ އިތުރުން ކުންފުނިން ދޭ ހިދުމަތްތަކަށް އޮންލައިންކޮށް އެދެވޭނެ ޕޯޓަލްތަކެއް ހިމެނޭކަމުގައި ވިދާޅުވެފައެވެ.
އެއީ ފެނަކަ ޓެންޑާ ޕޯޓަލް އަދި މައި ފެނަކަ ޕޯޓަލެވެ.
ފެނަކައިން ވިދާޅުވާ ގޮތުގައި މައި ފެނަކަ ޕޯޓަލްގެ ޒަރީއާއިން އެކި އެކި ކަންކަމުގައި ފެނަކަ ބަރާންޗްތަކަށް އައުމުގެ ދަތިތަކަށް ހައްލެއް ލިބިގެން ގޮސް އެކަންވެސް ލުއި ފަސޭހަވެގެންދާނެއެވެ.
އެގޮތުން އެ ޕޯޓަލް ފަރުމާކުރެވިގެންދާނީ، ޚިދުމަތްތަކުގެ ޕްކޭޖްތައް އެކުލަވާލެވި، ކަސްޓަމަރުންނަށް ފަސޭހަވާނެހެން ވަކިވަކި ޕެކޭޖްތައް ނެގޭނެހެންކަމުގައި އެ ކުންފުނިން ފާހަގަކުރެއެވެ.
މީގެ އިތުރުން، ފެނަކަ ޓެންޑަރ ޕޯޓަލްއަކީ، ހަމައެކަނި ޓެންޑާ ޕްރޮސެސްއަށް ހާއްސަކުރެވިފައިވާ ޕޯޓަލެއް ކަމަށް އެ ކުންފުނިން ވިދާޅުވެއެވެ. އެ ޕޯޓަލް މެދުވެރިކޮށް ޓެންޑާއަށް ރަޖިސްޓްރީ ކުރުމާއި، ބިޑް ހުށައެޅުމުގެ ހުރިހާ މަރުހަލާތަކެއް ކުރިއަށް ގެންދެވޭނެއެވެ.
