ބިދޭސީންނާއި ގުޅޭ އެއްވެސް ޖޫރިމަނާއެއް މިހާތަނަށް ނުދައްކާ 7501 ފަރާތެއް އެކްސްޕެޓް ސިސްޓަމުން ބްލޮކް ކޮށްލައިފިއެވެ.
ދާޚިލީ ވުޒާރާގެ ސްޓޭޓް މިނިސްޓަރު އަބްދުލް މަޖީދު އިބްރާހިމް ވިދާޅުވީ، މިހާތަނަށް އެއްވެސް ޖޫރިމަނާއެއް ނުދައްކާ 7501 ފަރާތެއް އެކްސްޕެޓް ސިސްޓަމަށް ނުވަދެވޭ ގޮތަށް ބްލޮކް ކޮށްފައިވާ ކަމަށާއި އެގޮތަށް ނިންމީ ފީތައް ނުދައްކާތީ ކަމަށެވެ.
މީގެ އިތުރުން މަދީޖު ވިދާޅުވީ، ޕޭމަންޓްތައް އެއްކޮށް ދައްކާ ނިމުމުން އެ ފަރާތްތަކަށް އަލުން އެ ސިސްޓަމް ބޭނުން ކުރެވޭނެ ކަމަށެވެ.
“ދައުލަތަށް ދައްކަން ޖެހޭ އެންމެ ރުފިޔާއެއް އޮތަސް އަޅުގަނޑުމެން ޖޫރިމަނާ ކުރާނަން” މަޖީދު
ހަމަ އެޔާއެކު ޖޫރިމަނާގެ ގޮތުގައި ދަންކަން ޖެހޭ އެންމެ ބޮޑު އަދަދަކީ 23.2 މިލިއަން ރުފިޔާ ކަމަށާއި އެ ފައިސާ ދެއްކުމަށް އެއް އަހަރު ދުވަހުގެ މުއްދަތެއް ދީފާއިވާ ކަމަށް މަޖީދުވަނީ ވިދާޅުވެފައެވެ.
ޖޫރިމަނާގެ އެއްވެސް ފައިސާއެއް ނުދައްކައިގެން 7501 ފަރާތެއް އެކްސްޕެޓް ސިސްޓަމުން ބްލޮކްކޮށްފައިވާއިރު، ރާއްޖޭގައި ވަޒީފާ އަދާ ކުރާ ބިދޭސީންނަށް ވަޒީފާ ދޭ ފަރާތްތަކުން ދައުލަތަށް ދައްކަންޖެހޭ ފީތަކާއި ޖޫރިމަނާގެ އަދަދު 100،000 ރުފިޔާއަށްވުރެ މަދުނަމަ ދެ ހަފްތާގެ ތެރޭގައި އެފައިސާ ދައްކާ ނިންމުމަށް މިމަހުގެ ދެވަނަ ދުވަހު ދާޚިލީ ވުޒާރާއިން ވަނީ އަންގާފައެވެ.
މިމުއްދަތުގެ ތެރޭގައި އެފައިސާ ނުދައްކާ ފަރާތްތަކުގެ ނަންތައް އާންމުކުރާނެ ކަމަށާއި އެކްސްޕެޓް ސިސްޓަމުން ވެސް އެފަރާތްތައް ސަސްޕެންޑް ކުރާނެ ކަމަށް އެވުޒާރާއިން މީގެ ކުރިން ބުނެފައިވެއެވެ.
ބިދޭސީންނަށް ވަޒީފާދޭ ފަރާތްތަކާއި، “އެކްސްޕެޓް ސިސްޓަމް” ބޭނުންކުރާ ފަރާތްތަކާއެކު ބިދޭސީންގެ މައްސަލާގައި ހިޔާލާއި މަޝްވަރާ ހޯދުމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވަނީ ބައްދަލުވުމެއްވެސް ބާއްވާފައެވެ.
ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވަނީ ބިދޭސީންނަށް ވަޒީފާދޭ ފަރާތްތަކާއި، “އެކްސްޕެޓް ސިސްޓަމް” ބޭނުންކުރާ ފަރާތްތަކާއެކު ބިދޭސީންގެ މައްސަލާގައި ހިޔާލާއި މަޝްވަރާ ހޯދުމަށް މީގެކުރިން ބައްދަލުވުމެއް ބާއްވާފައެވެ. މިބައްދަލުވުމުގައި ވަޒީރު ހާމަކުރައްވާފައިވާ ގޮތުގައި ރާއްޖޭގައި ބިދޭސީންނަށް ވަޒީފާ ދީގެން ގެންގުޅޭ މީހުންނާއި ކުންފުނިތަކުގެ އަދަދު 50000 އަށްވުރެ މައްޗަށް އަރާއިރު، އޭގެ ތެރެއިން 90 އިންސައްތަ ނުވަތަ 45000 އަށްވުރެ ގިނަ ކުންފުނިތަކަކީ ގަވާއިދުން ފީ ނުދައްކާ ފަރާތްތައް ކަމަށެވެ.
