އެމެރިކާގައި ދިރިއުޅޭ ދިވެހިރައްޔިތުންނާއެކު ރައީސް ޑރ މުޙައްމަދު މުޢިއްޒު ބައްދަލުވުމެއް ބާއްވަވައިފިއެވެ.
އދ. ގެ އާންމު މަޖިލިހުގެ 76 ވަނަ ސެޝަންގައި ބައިވެރިވެޑައިގަތުމަށް އެ ޤައުމަށް މިހާރު ކުރައްވަމުން ގެންދަވާ ދަތުރުފުޅުގައި އެމަނިކުފާނު ވަނީ، އެމެރިކާގެ ނިއުޔޯކާއި ކައިރި ސަރަހައްދުތަކުގައި ދިރިއުޅޭ ދިވެހިނާއި ބައްދަލުކުރައްވައި ވަގުތު ހޭދަކުރައްވައިފައެވެ.
އދ. އަށް ކަނޑައަޅާފައި ހުންނަ ދިވެހިރާއްޖޭގެ ދާއިމީ މިޝަންގައި އިއްޔެ ކުރިއަށް ދިޔަ މި ބައްދަލުވުމަށް ވަޑައިގެންނެވި ވަކިވަކި ދިވެހިންނާއި ބައްދަލުކުރައްވާ އެ ފަރާތްތަކުގެ ހާލު އޮޅުންފިލުވުމުގެ އިތުރުން، ދިވެހިންނަށް ބޭނުންވާ ކަންކަމާއި ގުޅޭގޮތުން ރައީސް މަޝްވަރާކުރެއްވި ކަމުގައި ރައީސް އޮފީހުން ވިދާޅުވެއެވެ.
އެގޮތުން މި ބައްދަލުކުރެއްވުމުން ފާހަގަވި ކަންކަން ޙައްލުކޮށްދެއްވުމަށް ސަރުކާރުން މަސައްކަތް ކުރައްވާނެ ކަމުގެ ފުރިހަމަ ޔަޤީންކަން އަރުވައިފައިވާކަމަށްވެސް ރައީސް އޮފީހުން ވަނީ ވިދާޅުވެފައެވެ.
މީގެ އިތުރުން ރައީސް ވަނީ ކޮންމެ ޤައުމެއްގައިވެސް ތިއްބަވާ ދިވެހި ރައްޔިތުން ޝާމިލްވާހެން ހުރިހާ ރައްޔިތުންގެ އަޑުވެސް އައްސަވައިގެން ސަރުކާރުގެ ސިޔާސަތުތައް އެކުލަަވާލެއްވުމަށް މަސައްކަތް ކުރައްވާކަމުގައިވެސް ވިދާޅުވެފައެވެ.
