ކާރަކާއި ސައިކަލެއް ޖެހި ހުޅުމާލޭގައި ހިނގި އެކްސިޑެންޓެއްގައި ސައިކަލުގައި އިން މީހަކު ނިޔާވުމާ ގުޅިގެން، ކާރު ދުއްވަން އިން މީހާގެ މައްޗަށް ދައުވާކޮށްފިއެވެ.
ޕްރޮސިކިއުޓާ ޖެނަރަލްގެ އޮފީހުން ހާމަކޮށްފައިވާ ގޮތުގައި މިމައްސަލައަކީ މިދިޔަ އޭޕްރީލް މަހުގެ 14 ވަނަ ދުވަހުގެ ރޭ 23:18 ހާއިރު ހުޅުމާލޭ އުރީދޫ ބިލްޑިންގް ކައިރީ ކާރަކާއި ސައިކަލެއް ޖެހިގެން ހިނގި އެކްސިޑެންޓެއްގައި ސައިކަލުގައި އިން މީހާ ނިޔާވުމާ ގުޅިގެން ކާރު ދުއްވަން ކ. ކާށިދޫ، ކެތި، މައުސޫމް ހަލީމްގެ މައްޗަށް ދައުވާ ކުރާ މައްސަލައެއް ކަމަށެވެ.
އެކްސިޑެންޓް ހިނގަން ދިމާވެފައި ވަނީ އުރީދޫ ބިލްޑިންގުން ހުޅަނގަށް އޮންނަ މަގުން ކާރު ދުއްވާފައި ދިޔައިރު ކަނާއަތަށް ސިގްނަލް ނުދީ ގޯޅިއެޅި ވަގުތު، ކާރު އޯވަޓޭކް ކުރަން އުޅުނު ސައިކަލުގައި ޖެހިގެން ކަމުގައި ޕީޖީން ވިދާޅުވިއެވެ. އަދި ސައިކަލުގައި ބަންގްލަދޭޝްއަށް ނިސްބަތްވާ ޝެއިހް ޝުވައިބް އާއި މަސްއޫދު ރަނާގެ ތިބި އިރު، އެދެމީހުން ކާރުގެ ދަށުވެ، ތާށިވެފައި އޮއްވައި މައުސޫމް ބާރު ސްޕީޑްގައި ކާރު ފަހަތަށް ޖެހުމުން އެދެމީހުންނަށް ވެސް ބޮޑެތި އަނިޔާތަކެއް ލިބުން ކަމުގައިވެސް އެއޮފީހުން އިތުރަށް ވިދާޅުވިއެވެ.
މިހާދިސާގައި ރަނާއަށް ލިބުނު އަނިޔާތަކުގެ ސަބަބުން އޭނާ ނިޔާވެފައިވާއިރު، އެމައްސަލަ އާއި ގުޅިގެން ދައުލަތުން ވަނީ މައުސޫމުގެ މައްޗަށް ތިން ދައުވާއެއް ކޮށްފައެވެ. އެއީ:
- ކާރު ދަށުގައި ރަނާ ތާށިވެފައިވަނިކޮށް، މައުސޫމް އޭނާގެ ހަށިގަނޑު މަތިން ބާރު ސްޕީޑްގައި ކާރު ފަހަތަށް ޖެހުމުގެ ސަބަބުން އޭނާއަށް ލިބުނު އަނިޔާތަކުގެ ސަބަބުން ރަނާ ނިޔާވެފައިވާތީވެ މީހަކު މަރުވެދިއުމުގެ ފަރުވާ ކުޑަ އަމަލެއް ކުރުމުގެ ދައުވާ
- ޝުވައިބް ކާރު ދަށުގައި ތާށިވެފައިވަނިކޮށް އޭނާގެ ހަށިގަނޑު މަތިން ބާރު ސްޕީޑްގައި ކާރު ފަހަތަށް ޖެހުމުގެ ސަބަބުން އޭނާއަށް ބޮޑެތި އަނިޔާތަކެއްވެފައިވާތީވެ އަނިޔާއެއް ދިނުމުގެ ދައުވާ
- އެ އެކްސިޑެންޓުގައި ކާރު ކޮންޓްރޯލް ނުކުރެވުމުގެ ސަބަބުން އެސަރަހައްދުގައި ޕާކުކޮށްފައި އޮތް އެހެން ކާރެއްގައި ޖެހުމުގެ ސަބަބުން އެކާރަށް ގެއްލުން ލިބިފައިވާތީވެ މުދަލަށް ގެއްލުން ދިނުމުގެ ދައުވާ.
މިފަހަކަށް އައިސް މާލެ ސަރަހައްދުގައި ހިނގާ އެކްސިޑެންޓުތައް ގިނަވެފައިވާއިރު، ފުލުހުންގެ ތަފާސް ހިސާބުތަކުން ދައްކާ ގޮތުގައި މިއަހަރު މިހާތަނަށް 1988 އެކްސިޑެންޓެއް ވަނީ ރިޕޯޓްކޮށްފައެވެ. އަދި މިދިޔަ އޮގަސްޓު މަހު އެކަނި 204 އެކްސިޑެންޓެއް ރިޕޯޓްކޮށްފައިވާ ކަމަށް ވެސް ފުލުހުންގެ ތަފާސް ހިސާބުތަކުން ދައްކައެވެ.
މިމަހުގެ ހަވަނަ ދުވަހުގެ ދަންވަރުވެސް އުރީދޫ ބިލްޑިންގު ކައިރިން ބާރު ސްޕީޑުގައި ދުއްވާފައި ދިޔަ ކާރެއް ސައިކަލެއްގައި ޖެހި، ސައިކަލު ދުއްވަން އިން 23 އަހަރުގެ ޒުވާނަކު ނިޔާވެފައިވާއިރު، މިމައްސަލަ އާއި ގުޅިގެން ފުލުހުން ވަނީ އުމުރުން 26 އަހަރުގެ ޒުވާނަކު ހައްޔަރުކޮށްފައެވެ.
މިފަދަ ހިތާމަވެރި އެކްސިޑެންޓްތަކުގައި ޒުވާނުންގެ ފުރާނައަށް ނުރައްކާވެ މީހުންނަށް ބޮޑެތި އަނިޔާތައް ލިބެމުންދާތީވެ ރައީސް ޑރ. މުޢިއްޒު ވަނީ މަގުތައް އަމާންތަނަކަށް ހެދުމަށް 8 ފިޔަވަޅެއް އެޅުމަށް ނިންމަވައި ވަގުތުން އެފިޔަވަޅުތައް އެޅުމަށް ކަމާއިބެހޭ އިދާރާތަކަށް އަމުރު ކުރައްވާފައެވެ.
