ބަނގުރާފުޅި ތަކަކާއެކު މާލެއިން ހައްޔަރުކުރި ބިދޭސީ މީހާގެ ބަންދަށް އިތުރު 15 ދުވަސް ޖަހައިފިއެވެ.
މި މަގުގެ 12 ވަނަ ދުވަހުގެ ރޭ ބޮޑުފުޅަށް ގޯޅީގައި އޮތް ކާރެއް ބަލައި ފާސްކޮށް އޭގެ ތެރެއިން ފެނުނު 106 ފުޅި ބަނގުރަލުގެ މައްސަލައިގައި ފުލުހުން ހައްޔަރުކޮށްފައިވަނީ ބަންގްލަދޭޝަށް ނިސްބަތްވާ އުމުރުން 30 އަހަރުގެ ރަސުލް އުލާ ރިދޯއީއެވެ.
ފުލުހުން ވިދާޅުވީ، އެ ގޯޅިއަށް ފުލުހުން ވަނުމާއެކު ކާރުގައި ތިބި މީހުން ފިލައިފައިވާކަމަށެވެ.
އެގޮތުން ރަސުލް އުލާ ރިދޯއީ ހައްޔަރުކުރުމަށް ފަހު އޭނާގެ ބަންދުގެ މުއްދަތައް ކްރިމިނަލް ކޯޓުން ޖެހި 15 ދުވަސް ހަމަވުމާއެކު އޭނާ ކޯޓަށް ހާޒިރު ކުރުމުން ކޯޓުން އަނެއްކާވެސް ރަސުލް އުލާ ރިދޯއީ އިތުރު 15 ދުވަހު ބަންދު ކުރުމަށް ވަނީ އަމުރުކޮށްފައެވެ.
މި މައްސަލައިގައި ރަސުލް އަށް ކުރެވެނީ ޤަވާއިދާ ހިލާފަށް ބަނގުރާ ގެންގުޅެ، އޭގެ ވިޔަފާރި ކުރިކަމުގެ ކުށުގެ ތުހުމަތެވެ.
އެހެން ނަމަވެސް އޭނާ ވަނީ އެ ތުހުމަތުތަކަށް ދެކޮޅު ހަދައިފައެވެ.
