ވޭޕްކުރުމުގެ ނުރައްކާތެރިކަމާއި ބެހޭ ގޮތުން ހޭލުންތެރި ކުރުވުމަށް ސްކޫލުތަކުގެ އިސްވެރީންނާއި ޕީޓީއޭއާ އެކު ސިލްސިލާ ބައްދަލުވުންތަކެއް އެޑިއުކޭޝަން މިނިސްޓްރީން ފަށައިފިއެވެ.
އެޑިއުކޭޝަން މިނިސްޓްރީން ފަށާފައިވާ މިބައްދަލުވުންތަކުގެ ތެރެއިން ފުރަތަމަ ބައްދަލުވުން ބާއްވާފައި ވަނީ މާލޭ ސަރަޙައްދުގެ ސްކޫލުތަކުގެ އިސްވެރީންނާއި ޕީޓީއޭ އަށް ޚާއްޞަކޮށްގެން މާލޭގައި ހުންނަ ސީއެޗްއެސްސީ ގައެވެ.
މިބައްދަލުވުމުގައި ސްކޫލު އުމުރުފުރައިގެ ދަރިވަރުން ވޭޕްކުރުމުން ދުރުކުރުމަށް ސްކޫލާއި ބެލެނިވެރިން ގުޅިގެން ކުރެވިދާނެ ކަންކަމުގެ މައްޗަށް މަޝްވާރާ ކުރެވުނުކަމަށް އެޑިއުކޭޝަން މިނިސްޓްރީން ވިދާޅުވިއެވެ.
މިބައްދަލުވުމުގައި އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު ބައިވެރިވެ ވަޑައިގެންފައިވާއިރު، ސްޓޭޓް މިނިސްޓަރ ޑރ. އަޙްމަދު މުޙައްމަދު، ސްކޫލް ސޭފްޓީ އެންޑް ހެލްތް ޑިވިޜަންގެ ޑިރެކްޓަރ ޖެނެރަލް ފާތިމަތު އައްޒަ އަދި ނޭވާލާ ނިޒާމުގެ ބަލިތަކަށް ޚާއްޞަ ޑޮކްޓަރެއް ކަމަށްވާ ޑރ. މުޙައްމަދު ޢަލީ ވަނީ ވޭޕް ކުރުމާއި ގުޅޭ ގޮތުން މައުލޫމާރު ދެއްވައިފައެވެ.
އެޑިއުކޭޝަން މިނިސްޓްރީން ހާމަކޮށްފައިވާ ގޮތުގައި ރާއްޖޭގެ ހުރިހާ ސްކޫލުތަކެއްގައި މި ބައްދަލުވުންތައް އޮންލައިންކޮށް ކުރިއަށް ގެންދިއުމަށް ވަނީ ހަމަޖެހިފައެވެ.
