އަމިއްލަ ޚަރަދުގައި މެނޭޖްކޮށް އޮޕަރޭޓް ކުރާގޮތަށް ކ. ތުލުސްދޫ ގައި 100 އެނދުގެ ހޮސްޕިޓަލަކާއި، މެޑިކަލް ކޮލެޖެއް އަޅައިދޭނެ ބަޔަކު ހޯދަން އިއުލާން ކޮށްފިއެވެ.
މިއީ މި މަޝްރޫއަށް ތުލުސްދޫ ކައުންސިލުން އިއުލާން ކޮށްފައިވާ ދެވަނަ ފަހަރެވެ. އެކައުންސިލުން ހާމަކޮށްފައިވާ ގޮތުގައި ދެވަނަ ފަހަރަށް އިއުލާނު ކުރީ ފުރަތަމަ ކުރި އިއުލާނަށް އެއްވެސް ފަރާތެއް ހޮވިފައިނުވާތީވެއެވެ.
އެގޮތުން މިއަދު އެކައުންސިލުން ކުރި އިއުލާނުގައި ބުނެފައި ވަނީ ތުލުސްދޫ ގައި އަމިއްލަ ޚަރަދުގައި މެނޭޖްކޮށް އޮޕަރޭޓް ކުރުމަށް، 100 އެނދުގެ ހޮސްޕިޓަލަކާއި، މެޑިކަލް ކޮލެޖެއް އެޅުމަށް ޝައުޤުވެރިވާ ފަރާތްތަކަށް، އެކަމަށް ބޭނުންވާ ބިން ދިގު މުއްދަތަކަށް ކުއްޔަށް ދިނުމަށް ނިންމާފައިވާ ކަމަށެވެ.
މާދަމާ އިން ފެށިގެން އަންނަ މަހުގެ ދެވަނަ ދުވަހުގެ ނިޔަލަށް މިމަޝްރޫއަށް ޝައުގުވެރިވާ ފަރާތްތަކަށް ބިޑް ފޮތް ލިބޭނެ ކަމަށާއި ބިޑް ފޮތުގެ އަގަކީ 2000 ރުފިޔާ ކަމަށް ވެސް އެކައުންސިލުން ބުނެފައިވެއެވެ.
މިޕްރޮޖެކްޓާއި ގުޅޭ މައުލޫމާތުގެ އިތުރުން ބިޑް ޕްރޮސެސިން ހިނގާނެ ގޮތް ބިޑް ފޮތުގައި ހިމަނާފައިވާނެ ކަމަށް ވެސް އެކައުންސިލުން އާއްމުކުރި އިއުލާންގައި ބަޔާންކޮށްފައިވެއެވެ.
