މީސްމީޑިއާ ޕްލެޓްފޯމެއް ކަމަށްވާ ފޭސްބުކްގައި ރައީސް ޑރ. މުހައްމަދު މުއިއްޒުއަށް މަރުގެ އިންޒާރުދިން މައްސަލަ ފުލުހުން ތަޙުޤީގު ކުރަން ފަށައިފިއެވެ.
އެމަނިކުފާނަށް މަރުގެ އިންޒާރު ދީފައި ވަނީ، އދ. ގެ އާންމު މަޖިލީހުގެ ހަވާސާގައި ބޭއްވި ބައްދަލުވުމުގައި ރައީސް ދެއްވަމުން ގެންދެވި ތަޤުރީރު ފޭސްބުކްގައި ލައިވްކުރަމުންދަނިކޮށް، އެއަށް “އަބްލޯ މިޔާދް ޔޯސެފް” ނަމުގައި އެކައުންޓަކުން ކުރި ކޮމެންޓެއްގައެވެ. އެކޮމެންޓުގައި އެމަނިކުފާނު “މަރާލާނެ” ކަމަށް ބުނެ ފަލަސްތީނު މިނިވަން ކުރުމަށްވެސް ގޮވައިލައިފައިވެ އެވެ.
މިމައްސަލަ އާއި ގުޅިގެން ފުލުހުންގެ ތަރުޖަމާނު އަދި އެސިސްޓަންޓް ކޮމިޝަނަރު އަހުމަދު ޝިފާން އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް މުއިއްޒުއާ ދެކޮޅަށް ނުރައްކާތެރި އިންޒާރުތަކެއް ދިން މައްސަލަ ފުލުހުން ބަލަން ފަށާފައިވާ ކަމަށެވެ.
ފުލުހުން މިމައްސަލަ ތަހުގީގު ކުރަން ފަށާފައިވާ ކަމަށް ބުނެ އެކްސްގައި ކުރި ޕޯސްޓަށްފަހު ރައީސްއަށް މަރުގެ އިންޒާރުދިން ފޭސްބުކް އެކައުންޓުގައި، އޭނާ ހައްޔަރު ކުރުމަށް ފުލުހުންނަށް ވަނީ ގޮވައިލައިފައިވާއިރު މީގެކުރިން ކޮށްފައި ހުރި އެފަދަ ކޮމެންޓުތަކެއް ވެސް މިހާރު މީސް މީޑިއާގައި ދައުރުވާން ފަށައިފައެވެ.
