ޤަވާއިދާއި ޚިލާފަށް ރާއްޖޭގައި ޙަރަކާތްތެރިވާ ބިދޭސީންގެ އިތުރުން ސާފުތާހިރުކަމުގެ މިންގަނޑައި ޚިލާފަށް ކާބޯތަކެތީގެ ޚިދުމަތްދެމުން އަންނަ ތަންތަން ބަލައި ފާސްކުރުމަށް އިމިގްރޭޝަނުން ހިންގަމުން އަންނަ އޮޕަރޭޝަންގެ ތެރެއިން 3 ކެފޭއަކަށް ނޯޓިސްދީ 16 ބިދޭސީއަކު އަތުލައިގަނެފިއެވެ.
އިމިގްރޭޝަނުން ހާމަކުރި ގޮތުގައި، އެ އިދާރާގެ ޓާސްކް ފީހުން މި ހަފްތާގެ އަންގާރަ އަދި ބުދަ ދެ ދުވަހު ހުޅުމާލޭގެ ފުރަތަމަ ފިޔަވަހީގެ ހޮޓާ އަދި ކެފޭތައް ބަލައި ފާސްކުރުމަށް ވަނީ ޚާއްސަ އޮަޕަރޭޝަނެއް ހިންގައިފައެވެ.
އެގޮތުން މި އޮޕަރޭޗަންގެ ތެރެއިން ބަލައި ފާސްކުރެވުނު ކެފޭތަކުގެ ތެރެއިން ނަގަން ޖެހޭ ހުއްދަތައް ނުނަގައި ހިންގަމުން އައިކަން ފާހަގަކުރެވުނު ތިން ކެފޭއަކަށް ނޯޓިސް ދީފައިވާކަމަށާއި އެ ތަންތަނުން ގަވާއިދާ ޚިލާފަށް އުޅޭ 16 ބިދޭސީއަކު އަތުލައިގެންފައިވާ ކަމަށް އިމިގްރޭޝަނުން ވަނީ ހާމަކޮށްފައެވެ.
https://x.com/ImmigrationMV/status/1839275910958297284
އެގޮތުން އެ މުއައްސަސާގެ އޮަޕަރޭޝަންތަކުގައި ހިންގާ ރެއިޑްތަކަށް އާންމުން ދެމުން އަންނަ އެއްބާރުލުން ފާހަގަކޮށް އިމިގްރޭޝަނުން ވަނީ ޝުކުރުއަދާކޮށްފައެވެ.
ރާއްޖޭގައި ބޮއްސުން ލައިފައިވާ ބިދޭސީންގެ މައްސަލަތައް ހައްކުކުރުމުގެ ގޮތުން ހޯމް މިނިސްޓްރީން، ދިވެހި ފުލުހުންނާއި އިމިގްރޭޝަނާއި ގުޅިގެން ހިންގަމުން އަންނަ އޮޕަރޭޝަންގެ ތެރެއިން ފާއިތުވި 10 މަސް ތެރޭގައި ގަވާއިދާ ޚިލާފުވެގެން ރާއްޖޭން 4،054 ބިދޭސީން އަނބުރާ ގައުމަށް ފޮނުވައިލާފައިވާ ކަމަށް އިމިގްރޭޝަނުން އާންމުކުރި ތަފާސް ހިސާބުތަކުން ދައްކައެވެ.
