ޝަޚުސު އޮޅުވާލައިގެން ރާއްޖެ އެތެރެވާން މަސައްކަތްކުރި ތިން ބިދޭސީއަކު އިމިގްރޭޝަނުން އަތުލައިގަނެފިއެވެ.
އެ އިދާރާއިން ހާމަކޮށްފައިވާ ގޮތުގައި ރާއްޖެ އެތެރެވާން އުޅުނު މި ތިން މީހުން ވެލާނާ އިންޓަރނޭޝަނަލް އެއަރޕޯޓުން ހިފަހައްޓައިފައި ވާއިރު މި ތިން މީހުންނަކީވެސް ތިން ފިރިހެނުންނެވެ.
އެ ތިންމީހުގެ ތެރޭގައި ހިމެނެނީ 25 އަހަރުގެ މީހަކާއި 23 އަހަރުގެ މީހެއްގެ އިތުރުން 21 އަހަރުގެ މީހެކެވެ.
މީގެ ތެރެއިން 25 އަހަރުގެ މީހާ ރާއްޖެ އެތެރެވުމަށް މަސައްކަތް ކޮށްފައި ވަނީ، ޖުލައިމަހުގެ 31ވަނަ ދުވަހުއެވެ. އަދި 23 އަހަރުގެ މީހާ އޮގަސްޓު 16ވަނަ ދުވަހު ރާއްޖެ އެތެރެވާން މަސައްކަތް ކުރި އިރު، 21 އަހަރުގެ މީހާ ރާއްޖެ އެތެރެވުމަށް މަސައްކަތް ކޮށްފައިވަނީ، އޮގަސްޓު 18 ވަނަ ދުވަހުއެވެ.
ގަވާއިދާ ޚިލާފަށް ރާއްޖޭގައި އުޅެ، އަދި ވިޔަފާރި ކުރާ ބިދޭސީންނާ ދެކޮޅަށް އިމިގްރޭޝަނުން އަންނަނީ ޚާއްސަ އޮޕަރޭޝަންތަކެއް ކުރިޔަށް ގެންދަމުންނެވެ.
މި އޮޕަރޭޝަނުގެ ތެރެއިން ފާއިތުވި 10 މަސް ތެރޭގައި ގަވާއިދާ ޚިލާފުވެގެން ރާއްޖޭން 4،054 ބިދޭސީން އަނބުރާ ގައުމަށް ފޮނުވައިލާފައިވާ ކަމަށް އިމިގްރޭޝަނުން ވަނީ ބުނެފައެވެ.
