ސަރުކާރު ހިންގާ މައި ޕާޓީ، ޕީއެންސީގެ އާންމު އިންތިޚާބު އަންނަ ނޮވެމްބަރު މަހަށް ފަސްކުރުމަށް ނިންމައިފިއެވެ.
އޮކްޓޫބަރު މަހުގައި ބޭއްވުމަށް މީގެ ކުރިން ނިންމާފައި އޮތް މި އިންތިޚާބު މިހާރު ބޭއްވުމަށް ނިންމައިފައިވަނީ އަންނަ ނޮވެމްބަރު މަހުގެ 9 ވަނަ ދުވަހުއެވެ.
އެގޮތުން އެ ޕާޓީން ހާމަކުރި ގޮތުގައި އެޕާޓީގެ އެތެރޭގެ އާންމު އިންތިޚާބު ނޮވެމްބަރަށް ފަސްކުރުމާއެކު އިންތިޚާބަށް ކުރިމަތިލުމުގެ ޝައުގުވެރިކަން ހުރި ޕާޓީގެ މެންބަރުންނަށް އެ ކަމަށް އެދި ހުށަހެޅުމަށް ދީފައިވާ މުއްދަތު ވެސް އޮކްޓޫބަރު 24ވާ ބުރާސްފަތި ދުވަހުގެ އިރުއޮއްސި 6 އަކާއި ހަމަޔަށް މިހާރު ވަނީ އިތުރު ކުރެވިފައެވެ.
އެގޮތުން އިންތިޚާބުގެ ތާރީޚު ފަސްކުރުމަށް ނިންމައިފައިވަނީ، ގިނަ އަދަދެއްގެ މެމްބަރުން އެކަމަށް އެެދެމުން ގެންދިއުމާއި ގުޅިގެން ކަމަށްވެސް އެ ޕާޓީން ބުނެއެވެ.
އިލެކްޝަންސް ކޮމިޝަނުން އާންމުކޮށްފައިވާ މައުލޫމާތުގައިވާ ގޮތުން، މި ހިނގާ ސެޕްޓެންބަރުގެ 19ވަނަ ދުވަހުގެ ނިޔަލަށް 28،983 މެންބަރުން ޕީއެންސީގައި އެބަ ތިއްބެވެ. އެއާ އެކު އެ ޕާޓީއަކީ މިހާރު ރާއްޖޭގެ ތިންވަނައަށް އެންމެ ބޮޑު ޕާޓީއެވެ.
