ދިވެހިރާއްޖޭގައި އިންވެސްޓް ކުރުމުގެ ދަޢުވަތު ނިއުޒިލޭންޑްގެ އިންވެސްޓަރުންނަށް އަރުވައިފިއެވެ.
މި ދަޢުވަތު އެ ޤައުމުގެ އިސްވެސްޓަރުންނަށް އެރުވީ، އދ.ގެ އާންމު މަޖިލީހުގެ 79 ވަނަ ސެޝަންގެ ހަވާސާގައި ބައިވެރިވެ ވަޑައިގަތުމަށް ރައީސް ޑރ މުޙައްމަދު މުޢިއްޒު ކުރައްވަމުން ގެންދަވާ ދަތުުރުފުޅުގެ ތެރެއިން ނިއުޒިލެންޑްގެ ބޮޑުވަޒީރުގެ ނައިބް، ހާރިޖީ ވަޒީރު އަދި މިނިސްޓާ އޮފް ރޭސިން ވިންސްޓަން ޕީޓަސްއާއެކު ކުރިއަށް ގެންދިޔަ ބައްދަލު ކުރެއްވުމުގެ ތެރެއިންނެވެ.
މި ބައްދަލުވުމުގައި ރައީސް ވަނީ، ނިއުޒިލެންޑްގެ އިންވެސްޓަރުންނަށް ރާއްޖޭގެ ޚާއްޞަ އިޤްތިޞާދީ ސަރަޙައްދުގައި އިންވެސްޓުކުރުމަށް ދަޢުވަތުދެއްވާފައެވެ. މީގެއިތުރުން ތަޢުލީމީ ދާއިރާގައި ހުރި ފުރުސަތުތަކުގެ މައްޗަށް ވެސް މި ބައްދަލުވުމުގައި ރައީސް ވަނީ ނިއުޒިލޭންޑްގެ ވެރިންނާއި ކުރެއްވި މަޝްވަރާތަކުގައި އަލިއަޅުއްވާލައިފައެވެ.
އެގޮތުން މި ބައްދަލުވުމުގެ ތެރެއިން ދެ ޤައުމުގެ ވެރިން ވަނީ، ދެ ޤައުމުގެ ދެމެދުގައި އޮތް ގުޅުން އިތުރަށް ވަރުގަދަ ކުރުމުގެ އިތުރުން، ދެ ޤައުމުގެ ދެމެދުގައި ވިޔަފާރީގެ ގުޅުން ވަރުގަދަ ކުރުމަށް ކުރެވިދާނެ ކަންކަމާއި ގުޅޭގޮތުން މަޝްވަރާ ކުރައްވައިފައެވެ.
އަދި ޖޯގްރަފީ ގޮތުން ރާއްޖެ އޮންނަ ތަނުގެ އިސްތިރާޖީ ފައިދާގެ ބޭނުން ހިއްސާކުރުމާމެދު ވެސް މި ބައްދަލުވުމުގައި މަޝްވަރާ ކުރެއްވިއެވެ.
