އާންމު ޚިދުމަތްތައް ފޯރުކޮށްދިނުމުގައި އާޓިފިޝަލް އިންޓަލިޖެންސް ބޭނުންކުރުމާ ގުޅޭގޮތުން ގޫގުލްއާއިއެކު ރައީސް ޑރ. މުހައްމަދު މުއިއްޒު މަޝްވަރާކުރައްވައިފިއެވެ.
އދ. ގެ އާންމު މަޖިލީހުގައި ބައިވެރިވެވަޑައިގެންނެވުމަށް ނިއުޔޯކަށް ކުރެއްވި ދުތުރުފުޅުގެ ތެރެއިން ގޫގުލް އޮފީހަށް ޒިޔާރަތް ކުރައްވާ އެމަނިކުފާނު ވަނީ ގޫގުލް އޮފީސް ބައްލަވާލައްވާފައެވެ.
ގޫގުލް އޮފީހުން އެމަނިކުފާނަށް މަރުހަބާ ވިދާޅުވީ ގޫގުލް ޕަބްލިކް ސެކްޓަރގެ ސީއީއޯ، ކެރެން ދޭހަތްއެވެ.
މިޒިޔާރަތުގައި އެމަނިކުފާނު ވަނީ ގޫގުލް އޮފީހުގައި ޓީމާއި ބައްދަލު ކުރައްވައި އާންމު ޚިދުމަތްތައް ފޯރުކޮށްދިނުމުގައި އާޓިފިޝަލް އިންޓަލިޖެންސް ބޭނުންކުރުމާއި ޑިޖިޓަލް ލިޓަރަސީ އަދި މޫސުމަށް އަންނަ ބަދަލުތަކަށް ވިލުންތެރިކަން އިތުރުކުރުމުގައި ޑޭޓާގެ މައްޗަށް ބިނާވެފައިވާ ޙައްލުތައް ހޯދުންފަދަ ދާއިރާތަކުގައި ގުޅިގެން މަސައްކަތްކުރުމާ ގުޅޭގޮތުން މަޝްވަރާކުރައްވާފައެވެ.
