ކުޑަކުއްޖަކަށް ޖިންސީ ގޯނާ ކުރި މައްސަލައެއްގެ ބަންދުގައި ޖަލުގައި ހުއްޓައި މި މަހުގެ 24 ވަނަ ދުވަހު ޖަންޖެހިފައި ހުއްޓައި ފެނުނު މީހާގެ ހަށިގަނޑު ޕޯސްޓް މޯޓަމް ހެދުމަށް ރާއްޖެއިން ބޭރަށް ފޮނުވައިފިއެވެ.
އެގޮތުން ގ. އެއްތެޔޮމާގޭ އުމުރުން 62 އަހަރުގެ ޢަބްދުލް ޣަނީ އިސްމާޢީލް މާފުށީ ޖަލުގައި ހުންނަ ގޮޅީގައި ދަންޖެހިފައި ހުއްޓައި ފެނިފައިވަނީ މިދިޔަ އަންގާރަ ދުވަހުގެ ހެނދުނު 6:52 ހާއިރު އޭނާ ހުންނަ ގޮޅިއަށް ސައި ހިފައިގެން ދިޔަ ޖަލު އޮފިސަރަކަށެވެ.
އެގޮތުން ފުލުހުން ހާމަކޮށްފައިވާގޮތުގައި އިއްޔެގެ ވަގުތެއްގައި އޭނާގެ ހަށިގަނޑު ވަނީ ޕޯސްޓް މޯޓަމް ހެދުމަށް ރާއްޖެއިން ބޭރަށް ފޮނުވައިލެވިފައެވެ.
އެ މީހާއަކީ މީގެ ކުރިން ވެސް ކުށުގެ ރިކޯޑު އޮތް މީހެއް ކަމަށްވާއިރު، މި މައްސަލަ ކަރެކްޝަންސްގެ ޕްރޮފެޝަނަލް ސްޓޭންޑަޑުން އަންނަނީ ތަހުގީގު ކުރަމުންނެވެ.
ފުލުހުންގެ ބެލުމުގެ ދަށުގައި ހުއްޓައި މިދިޔަ މަހުގެ 29 ވަނަ ދުވަހުވެސް ވަނީ މީހަކު ދަންޖެހިގެން މަރުވެފައެވެ. މަރުވެފައިވަނީ އަންހެނަކު ރަހީނުކޮށްގެން އުޅުނު މައްސަލައިގައި ހައްޔަރުކޮށްފައި ހުރި އަތުހަރު ނަމަކަށް ކިޔާ މީހެކެވެ.
