އދގެ އާންމު މަޖިލީހުގެ 79 ވަނަ ސެޝަން (ޔޫއެންޖީއޭ 79) ގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅު ނިންމަވާލެއްވުމަށްފަހު އެނބުުރި ރާއްޖެ ވަޑައިގަންނަވައިފިއެވެ.
މި މަހުގެ 20 ވަނަ ދުވަހުން އިއްޔެގެ ނިޔަލަށް އެމަނިކުފާނު އެމެރިކާއަށް ކުރެއްވި މި ދަތުުރުފުޅު ނިންމަވާލެއްވުމަށްފަހު އެނބުރި މާލެ ވަޑައިގަތީ މިއަދުގެ ހެނދުނުގެ ވަގުތެއްގައެވެ.
ފާހަގަކޮށްލެވޭގޮތުގައި މި ދަތުރުފުޅުގައި ރައީސް ވަނީ ފާއިތުވި 59 އަހަރު ތެރޭގައި ރާއްޖޭގެ ވެރިއަކު ، އދގެ ސަލާމަތީ މަޖިލީހުގެ ތަޅުމުގައި އިއްވި ތަޤުރީރު އިއްވަވައިފައެވެ.
ޔޫއެންޖީއޭ 79ވަނަ ސެޝަންގެ ހަވާސާގައި ކުރިއަށް ދިޔަ މުހިންމު އެތައް ބައްދަލުވުމެއްގެ ރިޔާސަތުގައި ކޯ-ޗެއަރއެއްގެ ހައިސިއްޔަތުން އެމަނިކުފާނު ވަނީ އިސް ދައުރެއް އަދާކުރައްވާފައެވެ. ހަވާސާ ބައްދަލުވުންތަކުގައި ރައީސްގެ ވާހަކަފުޅުތަކާއި، ތަޤުރީރުތައް މައިގަނޑު ގޮތެއްގައި އަމާޒު ކުރެއްވީ މޫސުމީ ނޭދެވޭ ބަދަލުތައް، އިއާދަކުރަނިވި ހަކަތަ، އިޖުތިމާއީ އަދި އިގްތިސާދީ ގޮންޖެހުންތަކާއި ޑިޖިޓަލައިޒް ކުރުން ފަދަ ކަންކަމަށެވެ.
ރައީސްގެ ދަތުރުފުޅުފުގައި ވަނީ ނީ ނިއުޔޯކަށް ވަޑައިގެންނެވި އެކި ވަފުދުތަކުގެ އެންމެ އިސްވެރިންނާ ބައްދަލު ކުރައްވާ، ދޭދޭ ޤައުމުގެ މެދުގައިވާ ގުޅުންތަކާއި ގުޅޭގޮތުން މަޝްވަރާކުރައްވައިފައެވެ.
އެގޮތުން ރައީސް ވަނީ، އދގެ ސެކްރެޓަރީ ޖެނެރަލް، އެންޓޯނިއޯ ގުޓޭރޭޒްއާވެސް ބައްދަލު ކުރައްވާފައެވެ. އަދި ނިއުޔޯކްގައި ދިރިއުޅެމުންދާ ދިވެހިންނާވެސް އެމަނިކުފާނު ވަނީ ބައްދަލު ކުރައްވާފައެވެ.
