ސަލްމާން މިސްކިތުގެ އިމާމު އަދި އިސްލާމިކް މިނިސްޓަރުގެ ނައިބު އަބްދުލް ޖަލީލު އިސްމާއީލްގެ މައްޗަށް ތުހުމަތު ކުރެވޭ ފޯޖަރީގެ މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ވިދާޅުވީ އޭނާގެ މައްޗަށް ތުހުމަތު ކުރެވޭ މައްސަލައެއް މިމަހުގެ 19 ވަނަ ދުވަހު ފުލުހުންނަށް ހުށަހަޅައިފައިވާ ކަމަށެވެ.
މައުލޫމާތު ލިބިފައިވާ ގޮތުގައި ޖަލީލުގެ މައްޗަށް ތުހުމަތުކޮށްފައި ވަނީ 2 ޖެނުއަރީ 2022 ގައި މާފަންނު ގެއެއްގެ ތެރޭގައި މަރުވެފައި އޮއްވައި ފެނުނު ހއ. ހޯރަފުށި، ޑީންސްވިލާގޭ، ހާޝިމް މުހައްމަދު (44އ) ގެ ނަމުގައި ހުރި ވިޔަފާރިތަކެއް އޭނާގެ ނަން މައްޗަށް ބަދަލުކުރި ކަމަށެވެ. އޭނާގެ މައްޗަށް މިތުހުމަތުތައް ކޮށްފައި ވަނީ ހާޝިމްގެ އާއިލާއިންނެވެ.
ހާޝިމްގެ އާއިލާ އާއި ޖަލީލު އާއި ދެމެދު ހުސްވި ހަފްތާގެ ހޯމަ ދުވަހު މާލޭގެ ފިހާރައެއްގެ ތެރޭގައި ހިނގައި ދިޔަ ހަމަނުޖެހުމެއްގެ ވީޑިއޯތައް މީސްމީޑިއާގައި ދައުރުވަމުންދާއިރު، މުދަލާއި ގެދޮރުގެ މައްސަލަތައް ސިވިލް ކޯޓަށް ހުށަހަޅައިގެން ކުރިއަށް ގެންދިޔުމަށް ފުލުހުން ވަނީ ދެފަރާތަށް ވެސް އިރުޝާދު ދެއްވާފައެވެ.
