ދ. ކުޑަހުވަދޫ ކައިރީގައި އޮތް މަސްދޯންޏެއްގައި ރޯވި އަލިފާން ނިއްވައިލައިފިއެވެ.
އަލިގާން ރޯވެފައި ވަނީ “ހަމްދު” ނަމަކަށް ކިޔާ ދޯންޏެއްގައެވެ. ފުލުހުން ބުނެފައިވާ ގޮތުގައި މިއަދު ހެނދުނު 6:30 ހާއިރު އަލިފާން ރޯވިކަމުގެ ޚަބަރު ފުލުހުންނަށް ލިބިފައިވާ ކަމަށާއި އެހިސާބުން އަލިފާންގަނޑު ނިއްވާލުމަށް ސިފައިންނާއި ފުލުހުން ހަރަކާތްތެރިވެފައިވާ ކަމަށެވެ.
އެމްއެންޑީއެފުން ހާމަކޮށްފައިވާ ގޮތުގައި ކަނޑިންމަ ރިސޯޓަށް ފެން ހިފައިގެން ދަތުރުކުރަމުން ދިޔަ “ހަމްދު” ނަމަކަށް ކިޔާ މުދާ އުފުލާ ދޯންޏެއްގެ އިންޖީނު ރޫމުގައި އަލިފާނުގެ ހާދިސާއެއް ހިނގައިގެން އުޅޭކަމުގެ މަޢުލޫމާތު އެމްއެންޑީއެފް ސެންޓްރަލް އޭރިއާ ކޮމާންޑް، ދ.ކުޑަހުވަދޫ ފަޔަރ ސްޓޭޝަނަށް މިއަދު ހެނދުނު 7:20 ހާއިރު ލިބިފައިވާ ކަމަށެވެ. އަދި އެޚަބަރު ލިބުމާއިއެކު އަލިފާންގަނޑު ނިއްވާލުމަށް ފަޔާ ފައިޓަރުން ހަރަކާތްތެރިވާން ފަށާފައިވާ ކަމަށެވެ.
މީގެއިތުރުން އަލިފާން ނިންވާލުމަށް ދ.ކުޑަހުވަދޫ ފަޔަރ ސްޓޭޝަނުގެ ފަޔަރ ފައިޓަރުންނަށް އެހީތެރިވުމަށް، އެމްއެންޑީއެފް ސެންޓްރަލް އޭރިއާ ކޮމާންޑް، ފ.ނިލަންދޫ ފަޔަރ ސްޓޭޝަންގެ ފަޔަރ ފައިޓަރުން ވެސް މިއަދު ހެނދުނު 11:00 ހާއިރުން ފެށިގެން އެ ސަރަހައްދުގައި ހަރަކާތްތެރިވަމުންދާ ކަމަށް އެމްއެންޑީއެފުން ބުނެފައިވެއެވެ.
އެމްއެންޑީއެފުން ބުނެފައިވާ ގޮތުގައި އަލިފާންގަނޑު ވަނީ މިހާރު ކޮންޓްރޯލް ކުރެވިފައެވެ. އަދި މިދޯނިން ދަތުރު ކުރަމުން ދިޔަ ހަތަރު މީހުންގެ ވެސް ހާލު ރަނގަޅު ކަމަށް ވެސް އެމްއެންޑީއެފުން ބުނެފައިވެއެވެ. ނަމަވެސް އަލިފާނުގެ ސަބަބުން ދޯނި ވަރަށް ވަނީ ވަރަށް ބޮޑަށް އަނދާ ގެއްލުން ލިބިފައެވެ.
