ފުލުހުންގެ ނާކޮޓިސް އިންޓެލިޖެންސަށް ލިބުނު މައުލޫމާތަކާއި ގުޅިގެން ގއ. ވިލިނގިލީގައި ހިނގި އޮޕަރޭޝަނެއްގައި މަސްތުވާތަކެއްޗާއެކު ތިން މީހަކު ހައްޔަރުކޮށްފިއެވެ.
ފުލުހުން ހާމަކުރި ގޮތުގައި މިމަހުގެ 28 ވަނަ ދުވަހު ހިންގި މި އޮޕަރޭޝަނަކީ އެރަށުގައި ބަޔަކު މަސްތުވާތަކެތި ވިއްކައި ވިޔަފާރިކުރާކަމަށް ލިބުނު މައުލޫމާތަކާއި ގުޅިގެން ހިންގުނު އޮޕަޜޭޝަނަށް ކަމަށެވެ.
އެގޮތުން މި އޮޕަރޭޝަނުގައި ހައްޔަރުކޮށްފައި ވަނީ، ގއ. ވިލިނގިލި / އެތެންސް، އުމުރުން 24 އަހަރުގެ މުހައްމަދު އަތޫފް ހަބީބުގެ އިތުރުން ގއ. ވިލިނގިލި / ޒޫމް، އުމުރުން 24 އަހަރުގެ މުހައްމަދު ތަޤިއްޔުއާއި ގދ. ގައްދޫ / ވިލަސް، އުމުރުން 23 އަހަރުގެ މުޙައްމަދު ޒަހުވާނެވެ.
މީގެ އިތުރުން ފުލުހުން ހާމަކުރި ގޮތުގައި ހައްޔަރުކުރި ތިން މީހުންގެ ތެރެއިން އެކެއްގެ ގެ ބަލައިފާސްކުރިއިރު މަސްތުވާތަކެތި ކަމަށްބެލެވޭ އެއްޗެއްހުރި ހަތް ރަބަރު ޕެކެޓާއި، ހަތަރު ރަބަރުކޮޅާއި، ސެލޯފިންކޮޅެއްގެ އިތުރުން ބަނގުރާ ކަމަށް ބެލެވޭ އެއްޗެއްހުރި 20 ލީޓަރުގެ ހަމެއް ވަނީ ފެނިފައެވެ.
ހަމައެޔާއެކު އެ ތިން މީހުންގެ ބަންދާމެދު ގޮތެއް ނިންމުމަށް ވިލިނގިލި މެޖިސްޓްރޭޓް ކޯޓަށް ހާޒިރުކުރުމުން މުހައްމަދު އަތޫފް ހަބީބް 15 ދުވަހަށް އަދި އަނެއް ދެ މީހުން 10 ދުވަހަށް ބަންދުކުރުމަށް އެ ކޯޓުން އަމުރުކޮށްފައިވާކަމަށް ފުލުހުން ވަނީ ހާމަކޮށްފައެވެ.
މި މައްސަލަ ވިލިނގިލި ޕޮލިސް ސްޓޭޝަނުން ގެންދަނީ ތަހުގީގުކުރަމުންނެވެ.
