ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފަކު އެ ބޭންކްގެ ކަސްޓަމަރުންގެ އެކައުންޓުން ފައިސާ ނެގިކަން ސާބިތުވެއްޖެއެވެ.
މި މައްސަލަ ސާބިތުވާކަމަށް ކަނޑައަޅައި ކްރިމިނަލް ކޯޓުން ޙުކުމްކޮށްފައި ވަނީ، ބ. އޭދަފުށި, ހިޔާވަހި, އަލީ މާޒިންގެ މައްޗަށެވެ.
މި މައްސަލައާއި ގުޅިގެން މާޒިންގެ މައްޗަށް އުފުލައިފައިވާ ޚިޔާނާތްތެރިވުމުގެ ދައުވާގައި ވަނީ، ބީއެމްއެލްގެ ކަސްޓަމާ ސާވިސް އެސިސްޓެންޓެއްގެ ގޮތުގައި ހުރެ, ލިބިފައިވާ މައުލޫމާތާއި ބާރުގެ ބޭނުންކޮށްގެން މެއި 14, 2021 އިން ސެޕްޓެމްބަރު 23, 2021 ގެ ނިޔަލަށް އެކި ދުވަސް މަތިން ކަސްޓަމަރުންގެ އެކައުންޓުން ފައިސާ ނެގި ކަމަށެވެ.
އެގޮތުން މާޒިން ވަނީ 13 ކަސްޓަމަރެއްގެ މައުލޫމާތު ބީއެމްއެލްގެ ސީއާރްއެމް ސިސްޓަމްއިން ބަދަލުކޮށް, ކަސްޓަމަރުންގެ ހުއްދަ ނެތި އެ ކަސްޓަމަރުންގެ އިންޓަނެޓް ބޭންކިން ރަޖިސްޓްރީކޮށްފައިކަމަށް އެ ކޯޓުގެ ޙުކުމުގައި ބުނެފައި ވެއެވެ.
މާޒިން ވަނީ 13 މީހެއްގެ އެކައުންޓުން ޖުމްލަ 482611.41 ރުފިޔާ ސައްހަ ނޫން ކްރެޑިޓް ކާޑު ޕޭމަންޓުގެ ގޮތުގައާއި ފޮރެކްސް ޓްރާންސެކްޝަނުގެ ގޮތުގައާއި މާޒިންގެ އަމިއްލަ އެކައުންޓަށް ޖަމާކޮށްފައިކަމަށް ވެސް އެ ޙުކުމުގައި ބުނެފައިވާއިރު ޝަރީއަތުގައި މާޒިން ވަނީ އޭނާގެ މައްޗަށް ކުރެވޭ ތުހުމަތުތަކަށް އިއުތިރާފްވެފައެވެ.
ދައުވާއަށް އިޢުތިރާފުވުމާއެކު ޕީޖީއާއެކު މާޒިންވެފައިވާ އެއްބަސްވުމުގެ ބުނެފައިވަނީ އެ ކުށަކީ 4 ވަނަ ދަރަޖައިގެ ކުށެއް ކަމަށާއި އެ ކުށުގެ އަސްލު އަދަބަކީ 1 އަހަރާއި 7 މަހާއި 6 ދުވަހަށް ޖަލަށްލުން ކަމަށެވެ. އެހެންނަމަވެސް އެއްބަސްވުމާއެކު އަދަބު 9 މަހާއި 18 ދުވަހަށް ބަދަލު އަންނާނެ ކަމަށް ބުނެފައިވެއެވެ.
އެ ޖަލު އަދަބު, 40 ގަޑިއިރު މުޖުތަމައުއަށް ހިދުމަތްކުރުމާއި 56,200 ރުފިޔާއިން ޖޫރިމަނާކުރުމުގެ އަދަބަކަށް ބަދަލުކުރެވޭ ގޮތަށް ޕީޖީއާއެކު އެއްބަސްވެފައިވެއެވެ. އަދި ބީއެމްއެލްއާއެކު މާޒިން ހަދާފައިވާ އެއްބަސްވުމުގައިވާ ގޮތަށް ގެއްލުމުގެ ބަދަލުގެ ފައިސާ ދައްކަމުން ގެންދިއުމަށް ވެސް ޕީޖީގެ އެއްބަސްވުމުގައިވެއެވެ.
އެގޮތަށް ހުކުމްކޮށް, ޖޫރިމަނާގެ ފައިސާ ތިން މަސް ދުވަހުގެ ތެރޭގައި މީރާއަށް ދެއްކުމަށް އަމުރުކޮށްފައިވެއެވެ.
