ސަރުކާރުގެ ކެބިނެޓްގެ ތިން މިނިސްޓްރީއެއްގެ މިނިސްޓަރުންގެ މަޤާމަށް ބަދަލުތަކެއް ގެނެއްސިއެވެ.
އެގޮތުން މީގެ ކުރިން ފޮރިން މިނިސްޓަރަކަށް ހުންނެވި މޫސާ ޒަމީރު ފިނޭންސް މިނިސްޓަރުކަމަށް އައްޔަނުކުރައްވައިފައި ވާއިރު، ކުރިން ހެލްތު މިނިސްޓަރަކަށް ހުންނެވި އަބްދުﷲ ޚަލީލު ވަނީ، ފޮރިން މިނިސްޓަރުކަމަށް އައްޔަނުކުރައްވައިފައެވެ.
އައު ހެލްތު މިނިސްޓަރަކަށް އައްޔަން ކުރެއްވީ،ރައީސް އޮފީހުގެ މިނިސްޓަރަކަށް ހުންނެވި ކުރީގެ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ.
މި ބޭފުޅުން މަޤާމުގެ ހުވާ ކުރެއްވުމާއި ފަތްކޮޅު އެރުއްވުން އޮތީ މިއަދުގެ މެންދުރު ފަހު ރައީސުލްޖުމްހޫރިއްޔާގެ އޮފީހުގައެވެ.
މި ތިންބޭފުޅުންނަށް މަޤާމުގެ ފަތްކޮޅު އަރުވައިފައިވަނީ، ރައީސުލްޖުމްހޫރިއްޔާ ޑރ މުހައްމަދު މުއިއްޒެވެ.
ރައީސުލްޖުމްހޫރިއްޔާ ކެބިނެޓަށް މިއަދު ބަދަލުތަކެއް މި ގެންނެވީ، ރާއްޖޭގެ މާލީ ނިޒާމު އޮތީ ނުރަނގަޅު ހާލަތެއްގައި ކަމާއި ހައްލު ކުރަން އަވަސް ފިޔަވަޅުތަކެއް އަޅަން ޖެހޭ ކަމަށް ބައިނަލްއަގުވާމީ އިދާރާތަކުން ބުނަމުން ގެންދާ ދަނޑިވަޅެއްގައެވެ.
ރައީސް އޮފީހުގެ ރަސްމީ ވެބްސައިޓްގައިވެސް މިހާރު ވަނީ މިނިސްޓަރުންނަށް ގެނެވި ބަދަލުތައް އަދާ ހާމަކޮށްފައެވެ.
