ދައުލަތަށް ދައްކަންޖެހޭ ޓެކްސް އާއި އެހެނިހެން އާމްދަނީގެ ގޮތުގައި ހުރި ފައިސާގެ ތެރެއިން 600 މިލިއަނަށް ވުރެ ގިނަ ރުފިޔާ މީރާ އިން ހޯދައިފިއެވެ.
މީރާ އާއްމުކޮށްފައިވާ ތަފާސްހިސާބުތަކުން ދައްކާ ގޮތުގައި މިއަހަރުގެ މިހާތަނަށް ފުރަތަމަ ކުއާޓާގައި ތަކުރާރުކޮށް ގުޅައިގެން މީރާއިން ވަނީ ޓެކްސްގެ ގޮތުގައި 515 މިލިއަން ރުފިޔާ ވަނީ ހޯދާފައެވެ. އެގޮތުން ޑިއުޒް ކްލިއަރެންސްގެ ގޮތުގައި 93 މިލިއަން ރުފިޔާ، އެކައުންޓު ފްރީޒްކޮށްގެން 21 މިލިއަން ރުފިޔާ އަދި އޯވަޑިއުވެފައިވާ ޕޭމަންޓްގެ ގޮތުގައި 12 މިލިއަން ރުފިޔާ ހޯދާފައިވާ ކަމަށް މީރާއިން ބުނެފައިވެއެވެ.
މީގެއިތުރުން ޓެކްސް ދައްކަން ޖެހޭ ފަރާތްތަކަށް ޓެކްސް ދައްކަން ހަނދާންކޮށްދީގެން 135،000 ރުފިޔާ އާއި ކޯޓު މަރުހަލާ މެދުވެރިކޮށް 10،000 ރުފިޔާ ހޯދާފައިވާ ކަމަށްވެސް މީރާއިން ހާމަކޮށްފައިވެއެވެ.
މީރާއިން ބުނެފައިވާ ގޮތުގައި ޓެކްސްގެ ގޮތުގައި ނުލިބޭ 5.5 ބިލިއަން ރުފިޔާ އާއި ރިސޯޓު ކުލީގެ ގޮތުގައި ނުލިބި ހުރި 4.3 ބިލިއަން ރުފިޔާ ހިމެނޭހެން ޓެކުހާއި ކުލީގެ ގޮތުގައި ދައުލަތަށް ލިބެންޖެހޭ އަދަދު 10 ބިލިއަން ރުފިޔާއަށް އަރާ ކަމަށެވެ.
ހަމައެއާއިއެކު ޓެކްސް ބަޔާން ހުށަހަޅަންޖެހޭ 10,796 ފަރާތަކުން ބަޔާން ހުށަނާޅާ ކަމަށާއި 8,947 ފަރާތެއް ޓެކްސް ނުދައްކާކަމަށް ވެސް މީރާއިން ހާމަކޮށްފައިވެއެވެ.
