ކަޓަރު ބޭނުންކޮށްގެން މާރާމާރީ ހިންގި މައްސަލައެއްގައި ހައްޔަރު ކުރި މީހާ ޝަރީއަތް ނިމެންދެން ބަންދު ކުރަން އަމުރުކޮށްފިއެވެ.
މިމައްސަލައިގައި ފުލުހުން ހައްޔަރުކޮށްފައި ވަނީ ތ. ތިމަރަފުއްޓަށް ނިސްބްތަވާ 30 އަހަރުގެ އަންހެނެކެވެ.
އޭނާގެ ބަންދު އަމުރުގައި ބަޔާންކޮށްފައިވާ ގޮތުގައި އޭނާގެ ތުހުމަތުކޮށްފައިވާ ތޫނު އެއްޗެއް ބޭނުންކޮށްގެން މަރާމާރީ ހިންގުމުގެ ކުށް އޭނާ ކޮށްފައިވާކަން ތުހުމަތުކުރެވޭ ވަރަށް ކޮންމެވެސް މިންވަރަކަށް ހެއްކާއި ޤަރީނާ ހުށަހަޅާފައިވާ ކަމަށެވެ.
އެގޮތުން އޭނާ ތޫނު އެއްޗަކުން ހަމަލާދިން ކަމަށާއި، ފުލުހުން އޭނާ ހައްޔަރު ކުރަން އުޅުނު ވަގުތު އޭނާ ވަޅިއެއް ބިންމައްޗަށް އެއްލާލި ކަމަށް ވެސް އޭނާގެ ބަންދު އަމުރުގައި ބަޔާންކޮށްފައިވެއެވެ.
މިމައްސަލައިގެ ކުރީގެ ބަންދު އަމުރަކާއި ހަވާލާދީ އޭނާ އެތަނަށް އައީ ފޯނު ހޯދަން ކަމަށާއި، އެއްވެސް މާރާމާރީއެއް ނުހިންގާ ކަމަށް ވެސް މިއަމުރުގައި ބުނެފައިވާއިރު، ފުލުހުން ވަނީ އޭނާގެ އަތުން ކަޓަރެއް ފެނިފައިވާ ކަމަށާއި އަނިޔާ ލިބުނު މީހާއަށް ހަމަލާދީފައިވަނީ ކަޓަރުން ކަމަށް ބެލެވޭ ކަމަށް ބުނެފައެވެ.
މީގެއިތުރުން، ހާދިސާ ހިނގި ތަނުގައި ހުރި މުދަލަށް ވެސް އޭނާ ގެއްލުން ދީފައިވާކަމަށް ވެސް ފުލުހުން ބުނެފައިއެވެ.
