އިއްޔެ ހަވީރު 5:04 ހާއިރު އުސްފަސްގަނޑާއި ދިމާލު ކަނޑުމަތިން މަރުވެފައި އޮއްވައި ފެނުން އިބްރާހީމް ޖައުހަރީ އިއްޔެގެ އަސުރެއް ހާއިރު ބްރިޖާއި ދިމާލުން މަސް ބާނަން އެރުނުކަން ހާމަވެއްޖެވެ.
މިކަމާއި ގުޅިގެން ފުލުހުން މިއަދު ހާމަކުރި ގޮތުގައި މޫދުގައި މަރުވެފައި އޮއްވައި ފެނުނު ވެލަސްފަރުގެ އިބްރާހީމް ޖައުހަރީ ބްރިޖާއި ދިމާލުން މޫދަށް މަސްބާނަން އިއްޔެ ފޭބިކަން މިހާތަނަށް ބެލި ބެލުމުން ހާމަވެފައިވާކަމަށެވެ.
ޖައުހަރީއަކީ ސިޔާސީ ޕާޓީތަކުން ބާއްވާ އެކިއެކި ހަރަކާތްތަކުގެ، ހާއްސަކޮށް އިދިކޮޅު އެމްޑީޕީގެ ހަރަކާތްތަކުގައި ފޮޓޯއާއި ވީޑިއޯތައް ނެގުމުގައި ފާހަގަކޮށްލެވޭ މީހެކެވެ.
ޖައުހަރީއަކީ ރާއްޖޭގެ މަޝްހޫރު ޤާނޫނީ ވަކީލެއް ކަމަށްވާ މަރިޔަމް ޝުނާނާގެ ބައްޕަވެސް މެއެވެ.
