މި އަހަރުގެ މިހާތަނަށް ޗައިނާއިން ރާއްޖެ ޒިޔާރަތްކުރި ފަތުރުވެރިންގެ ޖުމުލަ އަދަދުތައް ދެ ލައްކައިން މައްޗަށް ޖެހިލައިފިއެވެ.
ޓުއަރިޒަމް މިނިސްޓްރީން އާންމުކުރި ތަފާސް ހިސާބުތަކުން ދައްކާގޮތުގައި މިދިޔަ ސެޕްޓެމްބަރު މަހު 29 ވަނަ ދުވަހުގެ ނިޔަލަށް ޗައިނާއިން ރާއްޖެ ޒިޔާރަތްކުރި ފަތުރުވެރިންގެ އަދަދަކީ 218،366އެވެ.
މި އަހަރު ފެށުނީއްސުރެވެސް ރާއްޖެއަށް ފަތުރުވެރިން ޒިޔާރަތްކުރާ ޤައުމުތަކުގެ ލިސްޓްގެވެސް އެންމެ ކުރީގައި އޮތީވެސް ޗައިނާއެވެ.
އަހަރުގެ މިހާތަނަށް ދެވަނައަށް އެންމެ ގިނަ ފަތުރުވެރިން ޒިޔާރަތްކުރި ޤައުމަކީ ރަޝިޔާއެވެ. އެ ޤައުމުން 161،190 ފަތުރުވެރިން ރާއްޖެ ޒިޔާރަތްކުރި އިރު ތިންވަނައިގައި އޮތް އިނގިރޭސިވިލާތުން 125،747 ފަތުރުވެރިން ވަނީ އައިސްފައެވެ.
ހަތަރުވަނައިގައި އޮތް އިޓަލީން ރާއްޖެއަށް ޒިޔާރަތްކޮށްފައިވަނީ 106،3962 ފަތުރުވެރިންނެވެ.
އެ ތަފާސްހިސާބުތައް ދައްކާގޮތުން އަހަރުގެ މިހާތަނަށް ރާއްޖެއަށް 1،482،057 ފަތުރުވެރިން އައިސްފައިވާއިރު، މިއީ މިދިޔަ އަހަރުގެ މި މުއްދަތާއި އަޅައި ކިޔާއިރު 9.8 އިންސައްތައިގެ ކުރިއެރުމެކެވެ.
ޓުއަރިޒަމް މިނިސްޓްރީން ބުނާ ގޮތުގައި މި އަހަރު ސަރުކާރުގެ އަމާޒަކީ ރާއްޖެއަށް ދެ މިލިއަން ފަތުރުވެރިން ގެނައުމެވެ.
