މޯލްޑިވެސް ޕޯޓްސް ލިމިޓެޑު (އެމްޕީއެލް) އިން ހުޅުމާލޭގައި 10 ބުރީގެ އޮފީސް އިމާރާތެއް އެޅުމަށް ނިންމައި އެ އިމާރާތް އަޅައިދޭނެ ބަޔަކު ހޯދުމަށް އިއުލާން ކޮށްފިއެވެ.
އެގޮތުން އެ ކުންފުނިން އިއްޔެ ކުރި އިއުލާނެއްގައި ބުނެފައިވަނީ އެ ކުންފުނީގެ ފަރާތުން ހުޅުމާލޭގައި އިމާރާތް ކުރުމަށް ނިންމާފައިވާ 10 ބުރީގެ އޮފީހަކީ ފައިނޭންސިން އުސޫލުން އިމާރާތްކުރުމަށް ހަމަޖެހިފައިވާ އިމާރާތެއްކަމަށެވެ.
ހުޅުމާލޭ ފެރީ ޓަމިނަލް ކުރިމަތިން އޮންނަ ބިމުގައި އިމާރާތް ކުރުމަށް ހަމަ ޖެހިފައިވާ މި ޓަވަރުގައި ކޮންފަރެންސްތަކާއި އިވެންޓްތައް ބޭއްވުމަށް ހާއްސަ ފްލޯއަކާއި ކެފޭ/ރެސްޓޯރެންޓްތަކަށް ހާއްސަ ފްލޯއެއްގެ އިތުރުން ވިޔަފާރިތަކަށް ހާއްސަ ފްލޯތަކެއް ވެސް ކަނޑައަޅާފައިވެއެވެ.
އަދި މީހުން ދިރިއުލުމަށް އިމާރާތުގެ އަށްވަނަ ބުރި އާއި ނުވަވަނަ ބުރި ހާއްސަކޮށްފައިވާ އިރު މަތީގައި ރޫފް ޓޮޕްގައި ރެސްޓޯރެންޓެއް ހަދަން ނިންމާފައިވާކަމަށްވެސް އެމްޕީއެލުން ބުނެއެވެ.
ހަމަ އެޔާއެކު، އެ ކުންފުނީގެ މަސައްކަތަށް ހާއްސަ އޮފީސް އޭރިއާގެ އިތުރުން އެހެން ފަރާތްތަކަށް ކުއްޔަށް ދޫކުރުމަށް ވެސް އޮފީސް ޖާގަ އެ އިމާރާތުގައި ޤާއިމްކުރުމަށް ހަމަޖެހިފައިވާއިރު އެ ފްލޯއަކީ އިމާރާތުގެ 6 ވަނަ ފްލޯކަމުގައި އެމްޕީއެލުން ވަނީ ބުނެފައެވެ.
މި ޕްރޮޖެކްޓަށް ޝައުގުވެރިވާ ފަރާތްތަކުން މި މަހުގެ 10 ވަނަ ދުވަހުގެ ކުރިން އެކަމަށް ޝައުގުވެރިކަން ފާޅުކޮށް، “އެކްސްޕްރެޝަން އޮފް އިންޓްރެސްޓް” ހުށަހެޅުމަށް އެމްޕީއެލް ގެ އިއުލާނުގައި ވަނީ ބުނެފައެވެ.
