ފަތުރުވެރިކަމުގެ ސިނާއަތުން ރާއްޖެއަށް ލިބޭ ހުރިހާ ފައިސާއެއް ރާއްޖޭގެ ބޭންކްތަކަށް ޖަމާކުރުން ލާޒިމްކޮށް އައު އުސޫލެއް ކަނޑައަޅައިފިއެވެ.
އެގޮތުން އެމްއެމްއޭގެ ފަރާތުން އެކުލަވާލައި މިއަދު ގެޒެޓްކުރި ބޭރު ފައިސާއާއި ބެހޭ ޤަވާއިދުގައި ވަނީ، މިހާތަނަށް މީރާގައި ރަޖިސްޓަރީކޮށްގެ ރާއްޖޭގެ ފަތުރުވެރިކަމުގެ ދާއިރާގައި ޚިދުމަތް ދެމުން ގެންދާ ފަރާތްތަކުން ކުރިއަށް އޮތް 30 ދުވަހުގެ ތެރޭގައި އަލުން އެމްއެމްއޭގައި ރެޖިސްޓަރ ކުރުމަށް ހުޅުވައިލާނެ ކަމަށެވެ.
އަދި ހަމައެޔާއެކު ކުރިއަށް އޮތް ތަނުގައި އަލަށް މީރާގައި ރަޖިސްޓަރީވާ ފަރާތްތަކުން އެމްއެމްއޭގައި ރަޖިސްޓަރ ވުމަށް 30 ދުވަހުގެ މުހުލަތެއް ދެވިގެން ދާނެކަމަށް މިއަދު ގެޒެޓްކުރި ޤަވާއިދުގައި ވެއެވެ.
މީގެ އިތުރުން އެ ޤަވާއިދު ބުނާގޮތުން ރާއްޖޭގައި ފަތުރުވެރިކަމުގެ ޚިދުމަތްތަކާއި އެ ސިނާއަތަށް މުދާ ދޫކުރާ ފަރާތްތައް ކޮންމެ މަހަކުވެސް ކުރެވޭ ހޭދައާއި މުޢާމަލާތްތަކުގެ ތަފްސީލު ޖެހިގެން އަންނަ މަހުގެ 28 ވަނަ ދުވަހުގެ ނިޔަލަށް އެމްއެމްއޭއަށް ހުށަހަޅަން ޖެހޭނެއެވެ.
އަދި މީގެ އިތުރުން ކޮންމެ މަހަކުވެސް އާމްދަނީ ގެ ގޮތުގައި ލިބޭ ބޭރުގެ ހުރިހާ ފައިސާއެއް ލިބޭތާ ލަސްވެގެން 87 ދުވަސްތެރޭގައި ދިވެހި ބޭންކެއްގައި ހުޅުވައިފައިވާ ބޭރު ފައިސާ އެކައުންޓަަކަށް ޖަމާކުރުން އެ ޤަވާއިދުގެ ދަށުން ލާޒިމްކުރެއެވެ.
އަދި އެ ޖަމާކުރާ ފައިސާގެ ތަފްސީލު އެމްއެމްއޭއަށް ހުށަހަޅަން ޖެހޭގޮތަށް މިއަދު އެކުލަވާލައި އުސޫލުގައިވާ ވަނީ ހިމަނައިފައެވެ.
އެމްއެމްއޭއިން މިއަދު އާންމު ކުރި އުސޫލުގައި 12 ދާއިރާއެއް ފިޔަވައި ފަތުރުވެރިކަމުގެ ހުރިހާ ދާއިރާގައި ރާއްޖޭގައި ކުރާ ހުރިހާ މުއާމަލާތެއް ދިވެހި ރުފިޔާއިން ކުރުމަށް ވަނީ ކަނޑައަޅައިފައެވެ.
އިސްތިސްނާ ކުރި 12 ދާއިރާއަކީ:
– ސަރުކާރަށް ނުވަތަ ދައުލަތަށް ހޭދަކުރާ ފައިސާ.
– ރެމިޓެންސް ހިދުމަތްދޭ ފަރާތްތަކާ އެކު ހިންގާ މުއާމަލާތްތައް.
– ޓޫރިޒަމް ދާއިރާއަށް ވިއްކާ އިންޝުއަރެންސް ޕޮލިސީތަކާ ގުޅޭ މުއާމަލާތްތައް.
– ބޭރުގެ މުއާމަލާތްތައް.
– ޓޫރިސްޓުންނަށް ވިއްކާ މުދަލާއި ހިދުމަތުގެ އަގު.
– އެކްސްޕޯޓު ކުރެވޭ މުދަލާއި ހިދުމަތުގެ އަގު.
– ބޭރު ފައިސާއިން އާމްދަނީ ލިބޭ ވިޔަފާރިއަކުން ގަންނަ މުދަލެއް/ހިދުމަތަކަށް.
– ބޭރު ފައިސާއިން އާމްދަނީ ލިބޭ ވިޔަފަރިއަކުން ޑިވިޑެންޑް ދިނުމައި ހިއްސާދާރުންނާ ދެމެދު ހިންގާ މުއާމަލާތްތައް.
– ބޭރު ފައިސާއިން އާމްދަނީ ލިބޭ ވިޔަފާރިއެއްގެ ހިއްސާ ގަނެވިއްކުން.
– ބޭރު ފައިސާއިން އާމްދަނީ ލިބޭ ވިޔަފާރިއަކުން ބޭނުން ނަމަ މުސާރަ އާއި އިނާޔަތް ބޭރު ފައިސާއިން ދިނުން.
– ޑިއުޓީ ފްރީ ފިހާރަތަކުން ޓޫރިސްޓުންނަށް ވިއްކާ މުދަލާއި ހިދުމަތުގެ އަގު
ހަމައެޔާއެކު މި އުސޫލުގައި، ކަނޑައެޅިފައިވާ އެއްވެސް އުސޫލަކާއި ޚިލާފަށް އެއްވެސް މުއާމަލާތެއް ބޭރުފައިސާ އިން ކޮށްފިނަމަ އެ ފަރާތެއް 10000 ރުފިޔާއާއި އެއް މިލިއަނާއި ދެމެދުގެ އަގަކުން ޖޫރިމަނާ ކުރެވޭނެކަން ވަނީ އަންގައިފައި ވެސް މެއެވެ.
އަދި ޤަވާއިދުގެ ފަސް ވަނަ މާއްދާ އިން ފެށިގެން 9 ވަނަ މާއްދާގެ ނިޔަލަށް ހުރި މާއްދާތަކާ ޚިލާފުވެއްޖެ ނަމަ 5،000ރ. އިން ފެށިގެން އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް މިއަދު ގެޒެޓްކުރި ޤަވާއިދުގައި ބުނެފައިވެއެވެ.
ރާއްޖޭގެ ކަޅު ޑޮލަރުގެ ވިޔަފާރީ ފުޅާވެ ޑޮލަރުގެ ތާށިކަން އުޅުމާއި ގުޅިގެން ސަރުކާރުން އަންނަނީ އެކަން ހައްލުކުރުމަށް ގިނަ މަސައްކަތްތަކެއް ކުރަމުންނެވެ.
