ސްކޫލަކަށް ވަދެ ބިރުދެއްކި މީހާއަށް ދައުވާ ކުރަން ނުފޮނުވައި އޮއްވައި އޭނާގެ ބަންދުގެ މުއްދަތު ހަމަވެގެން ދޫކޮށްލައިފިއެވެ.
އޭނާ ހައްޔަރުކޮށްފައި ވަނީ، މި އަހަރުގެ އޯގަސްޓްމަހުގެ 6 ވަނަ ދުވަހު މާލޭގެ ސްކޫލަކަށް ވަދެ އަޑުގަދަކޮށް ދަރިވަރުންނަށް ބައެއް ޓީޗަރުންގެ ކުރިމަތީގައި ބިރުދެއްކި މައްސަލައިގައެވެ.
މި މައްސަލައިގައި ހައްޔަރުކޮށްފައި ވަނީ 41 އަހަރުގެ ދިވެހި ފިރިހެނެކެވެ.
އޭގެ ފަހުން އިއްޔެއާ ހަމައަށް އޭނާ ބަންދުގައި ހުރިއިރު، އޭނާގެ މައްޗަށް ދައުވާކުރަން އެދި މިދިޔަ މަހު 16 ގައި ފުލުހުން ވަނީ ޕްރޮސެކިއުޓާ ޖެނެރަލް (ޕީޖީ)ގެ އޮފީހަށް ފޮނުވައިފައެވެ.
އެހެން ނަމަވެސް މިއަދާއި ހަމައަށްވެސް އޭނާއަށް ދައުވާ ކުރުމާއި ބެހޭގޮތުންވެސް އަދި އޭނާއަށް ދައުވާ ކުރަން ނުފޮނުވައި ލަސްވުމާއި ގުޅޭގޮތުންވެސް ޕީޖީ އޮފީހުގެ ބަހެއް ލިބިފައެއް ނުވެއެވެ.
އެންމެ ފަހުން އެ ދުވަހު އޭނާގެ ބަންދަށް ކްރިމިނަލް ކޯޓުން ދިން 15 ދުވަސް ހަމަވެގެން އިއްޔެ ކޯޓަށް ހާޒިރުކުރުމުން އޭނާ ބަންދުން ދޫކޮށްލަން ދައުލަތުން އިންކާރުނުކުރާތީއާއި މި ވަގުތު އޭނާ ބަންދުގައި ބަހައްޓަން ޖެހޭ ހާލަތެއް ނެތް ކަމަށް ނިންމައި ބަންދުން ދޫކޮށްލަން ވަނީ ނިންމައިފައެވެ.
އޭނާ ބަންދުކުރުމަށް ކުރިން ނެރުނު ކޯޓު އަމުރުގައި ވަނީ މި މައްސަލައިގައި ބަންދުކުރި މީހާއަކީ ބިރުދެއްކުމުގެ މައްސަލަތަކުގެ ކުށުގެ ރިކޯޑު އޮތް މީހެއްކަން ފާހަގަކޮށްފައެވެ. ކުރިން އޭނާ ބަންދުގައި ބަހައްޓާފައި ހުރީ ވެސް އެ ފަދަ ކަމެއް ތަކުރާރުވުމުގެ ފުރުސަތު އޮތުމުންނެވެ.
