ހދ. ހިރިމަރަދޫގެ ފެނާއި ނަރުދަމާގެ މަޝްރޫޢު ނިމި އިންސްޕެކްޝަންގެ މަސައްކަތް ފަށައިފިއެވެ.
މިއިންސްޕެކްޝަންގައި މިނިސްޓްރީ އޮފް ކޮންސްޓްރަކްޝަން އެންޑް އިންފަސްޓްރަކްޗާގެ ސްޓޭޓް މިނިސްޓާ އިސްމާޢީލް ޙަމީދު އަދި ޑެޕިއުޓީ މިނިސްޓަރ ޢަލީ ސަލީމްގެ އިތުރުން ކޮންސްޓްރަކްޝަން މިނިސްޓްރީ އަދި އެމްޑަބްލިއުއެސްސީ ގެ ޓެކްނިކަލް ޓީމުންދަނީ ހަރަކާތްތެރިވަމުންނެވެ.
މިނިސްޓްރީން ހާމަކޮށްފައިވާ ގޮތުގައި މިމަޝްރޫއުގައި 34 ޓަނުގެ 2 އާރްއޯ ޕްލާންޓް، 180 ކޮޑިމީޓަރުގެ 2 އާރްއޯ ޓޭންކް އަދި 620 ކޮޑިމީޓަރުގެ 2 އާރްއޯ ޓޭންކް އަދި ސްވަރޭޖް ޕަންފު ސްޓޭޝަން ހިމެނޭނެ ކަމަށެވެ.
މިމަޝްރޫއުގެ މަޤްސަދަކީ ހިރިމަރަދޫގެ ރައްޔިތުންނަށް ފެނާއި ނަރުދަމާގެ ހިދުމަތް ފޯރުކޮށްދިނުން ކަމަށް މިނިސްޓްރީން ވިދާޅުވިއެވެ.
ހިރިމަރަދޫ ފެނާއި ނަރުދަމާ ޤާއިމްކުރުުމުގެ މަސައްކަތަކީ 2021 ވަނަ އަހަރުގެ ޑިސެމްބަރު މަހުގައި އޭރުގެ ރައީސް އިބްރާހީމް މުހައްމަދު ޞާލިހްގެ ސަރުކާރުން 69.14 މިލިއަން ރުފިޔާއަށް އެމްޑަބްލިޔުއެސްއީ އާއި ހަވާލުކޮށްގެން ފެށި މަސައްކަތެކެވެ.
