ކުޑަކުއްޖަކަށް ޖިންސީ އަނިޔާކުރި މައްސަލައެއްގައި މާފުށީ ޖަލުގައި ބަންދުގައި ހުއްޓައި ދަންޖެހިގެން އަމިއްލައަށް މަރުވި މީހާގެ ހަށިގަނޑު، ޕޯސްޓް މޯޓަމް ހެދުމަށްފަހު އޭނާގެ އާއިލާއާއި ހަވާލުކޮށްފިއެވެ.
މާފުށީ ޖަލުގައި ބަންދުގައި ބަހައްޓާފައި ހުއްޓައި މިދިޔަ މަހުގެ 27 ވަނަ ދުވަހު ދަންޖެހިގެން އަމިއްލައަށް މަރުވެފައިވަނީ ގ. އެއްތެޔޮމާގޭ އުމުރުން 62 އަހަރުގެ އަބްދުލް ޣަނީ އިސްމާއީލެވެ.
ފުލުހުން ހާމަކުރި ގޮތުގައި އޭނާގެ ހަށިގަނޑު ޕޯސްޓް މޯޓަމް ހެދުމަށްފަހު އިއްޔެގެ ވަގުތެއްގައި މާލެ ގެނެސް އާއިލާއާއި ވަނީ ހަވާލުކޮށްފައެވެ.
މި ހާދިސާއާ ގުޅިގެން ނޭޝަނަލް އެންޓަގްރިޓީ ކޮމިޝަން (އެންއައިސީ)ގެ ޓީމެއް ވެސް ވަނީ މިކަން ހިނގައިދިޔަ ގޮތް ބެލުމަށް ހަރަކާތްތެރި ވެފައެވެ.
މިދިޔަ މަހުގެ ކުރީ ކޮޅުގައިވެސް ވަނީ، މާފުށީ ޖަލުގައި ބަންދުގައި ހުރި މީހަކު އަމިއްލައަށް ދަންޖެހިގެން މަރުވެފައެވެ. އެއީ ލޯބިވެރިޔާ ރަހީނުކޮށްގެން ވަޅިން ބިރު ދެއްކި މައްސަލާގައި ޝަރީއަތް ނިމެންދެން ދޫނިދޫ ޖަލުގައި ބަންދުކޮށްފައި ހުރި އަތުހަރެވެ.
މި އަހަރުގެ ކުރީކޮޅު ހޯމް މިނިސްޓްރީން ވަނީ، ފުލުހުންގެ ބެލުމުގެ ދަށުގައި ތިއްބައި ނިޔާވާ ހުރިހާ މީހުންގެވެސް ޕޯސްޓްމޯޓަމް ހެދުމަށް ނިންމައިފައެވެ.
