ސިނާޢީ ބޭނުންތަކަށް ހުޅުމާލޭގެ ދެވަނަ ފިޔަވަހިން 12 ބިމެއް ވިއްކުމަށް ނިންމައި ބިންތައް ވިއްކުމަށް ހުޅުވާލައިފިއެވެ.
ހައުސިންގް ޑިވޮލިޕްމަންޓް ކޯޕަރޭޝަން (އެޗްޑީސީ) ން ކުރި އިއުލާނެއްގައި ބުނެފައިވަނީ، ހުޅުމާލޭ ދެވަނަ ފިޔަވަހިން ސިނާޢީ ބޭނުންތަކަށް ވިއްކުމަށް ނިންމާފައިވާ މި ބިންތަކަށް އެދި ހުށަހެޅޭނީ ހަމައެކަނި ދިވެހިންނަށް ކަމަށެވެ.
އެގޮތުން އުމުރުން 18 އަހަރުވެފައިވާ ކޮންމެ ދިވެހި ރައްޔިތަކަށް ވެސް މި ބިން ގަތުމަށްޓަކައި ބީލަން ހުށަހެޅުމުގެ ފުރުސަތު ހުޅުވާލެވިފައިވާ ކަމަށްވެސް އެ ކޯޕަރޭޝަނުން ބުނެފައިވެއެވެ.
މީގެ އިތުރުން އެޗްޑީސީގެ އިއުލާނުގައި ބުނެފައިވަނީ، ބިން ގަތުމަށްޓަކައި ކުންފުނިތަކުން ބީލަން ހުށަހަޅާނަމަ އެ ކުންފުންޏަކީ ރާއްޖޭގައި ރަޖިސްޓްރީ ކޮށްފައިވާ %100 ދިވެހިންގެ ހިއްސާ އޮންނަ ކުންފުންޏެއްކަމުގައިވެސް ވާން ޖެހޭނެކަމަށެވެ.
ދެ މަރުޙަލާއަކަށް ބަހާލައިގެން ވިއްކާ މި ބިންތަކުގެ ތެރޭގައި 3,689 އަކަފޫޓާއި 3,746 އަކަފޫޓާ ދެމެދުގެ 12 ބިމެއް ހިމެނެއެވެ.
އެގޮތުން ފުރަތަމަ މަރުހަލާގައި ބިން ވިއްކުމަށް ހަމަޖެހިފައިވަނީ، އެކްސްޕްރެޝަން އޮފް އިންޓަރެސްޓް (އީ އޯ އައި) ހުށަހެޅުމުގެ ދަށުންނެވެ. އަދި ދެވަނަ މަރުހަލާއަކީ ގަންނަން ކަނޑައަޅާފައިވާ ބިމަށް އެއް ފަރާތަށް ވުރެ ގިނަ ފަރާތުން އީ އޯ އައި ހުށަހަޅާފައި ވާނަމަ އެ ބިންތައް ވިއްކުމަށް ހަމަޖެހިފައިވަނީ ބިޑް ކޮށްގެން ކަމުގައިކަމަށް އެ ކޯޕަރޭޝަންގެ އިއުލާނުގައި ބުނެފައިވެއެވެ.
މި ބިންތަކުގެ ބީލަންތައް ފެށޭ އަގަކީ އަކަފޫޓަކަށް 7،500ރ ކަމަށާއި ކޮންމެ ފަރާތަކަށްވެސް ޖުމުލަ 3 ބިން ގަތުމުގެ ފުރުސަތު ހުޅުވާލެވިފައިވާ ކަމަށްވެސް އެޗްޑީސީން ބުނެއެވެ.
ބީލަންތައް ކުރިއަށްގެންދިއުމަށް ހަމަޖެހިފައިވަނީ އެޗްޑީސީގެ އޮންލައިން ބިޑް ޕޯޓަލް: https://bids.hdc.mv މެދުވެރިކޮށެވެ. އެގޮތުން، މިހާރު ވިއްކުމަށް ހުޅުވާލެވިފައިވާ ބިންތަކުގެ މައުލޫމާތު ބިޑް ޕޯޓަލް މެދުވެރިކޮށް ލިބެން ހުންނާނެކަމަށާއި ގުޅޭ އިތުރު މައުލޫމާތު، މި ކޯޕަރޭޝަންގެ ހޮޓްލައިން ނަންބަރު 1516 އަށް ގުޅުއްވައިގެން ވެސް މައުލޫމާތު ސާފުކުރެވޭނެ ކަމަށްވެސް އެޗްޑީސީން ބުނެފައިވެއެވެ.
