އެފްއޭއެމްގެ ފައިސާއިން ހުޅުމާލޭ އަމީން އެވެނިއު އިން އެ އެސޯސިއޭޝަންގެ ކުރީގެ ރައީސް ބައްސާމް ގަނެފައިވާ ދެ އެޕާޓްމަންޓް ފުލުހުންނާއި ހަވާލުކުރުމަށް ދިން މުހުލަތު އިތުރުކޮށްދިނީ އޭނާގެ ޙާލަތަށް ރިޢާޔަކޮށް ކަމުގައި ފުލުހުން ހާމަކޮށްފިއެވެ.
މި މަހުގެ 6 ވަނަ ދުވަހުގެ ނިޔަލަށް އެ ދެ އެޕާޓްމަންޓް ފުލުހުންނާއި ހަވާލުކުރުމަށް ބައްސާމްގެ މައްޗަށް އަމުުރުކޮށްފައި ވަނިކޮށް ބައްސާމްގެ ފަރާތުން އޭނާގެ ވަކީލުން ވަނީ އެ މުއްދަތު މި މަހުގެ 31 ވަނަ ދުވަހުގެ ނިޔަލަށް އިތުރުކޮށްދިނުމަށް އެދި އިއްޔެ ހެނދުނު ފުލުހަށް ސިޓީއެއް ހުށަހަޅައިފައެވެ.
މިކަމާއި ގުޅިގެން ފުލުހުން މިއަދު ބުނެފައިވަނީ ބައްސާމު އެދުނު ގޮތަށް އެޕާޓްމަންޓް ހަވާލުކުުރުން މި މަހުގެ 31 ވަނަ ދުވަހުގެ ނިޔަލަށް އިތުރުކޮށްދީފައިވަނީ، އެ އެޕާޓްމަންޓާއި ހަވާލުވުމަށް ފުލުހުންގެ މައްޗަށް ކޯޓުން ކުރި އަމުރުގައި އިންސާނީ ކަރާމާތަށް ހުރުމަތްތެރިކޮށް ހިތުމަށް އަމުރުކޮށްފައި ވުމުން ކަމުގައެވެ.
އެގޮތުން އެ އެޕާޓްމަންޓުތަކަކީ ބޮޑެތި މީހުންނާއި އަދި ކުޑަކުދިންވެސް ދިރިއުޅެމުންދާ އެޕާޓްމަންޓުތަކަކަށް ވާތީ ހާލަތައް ރިޢާޔަތްކުރުމުގައި އެކަންކަމަށް ބަލައިފައިވާނެކަމަށް ފުލުހުން ވަނީ ބުނެފައެވެ.
ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރުގެ އެފްއޭއެމްގެ ރައީސް ބައްސާމް، އަމިން އެވެނިއުއިން ދެ އެޕާޓްމެންޓް ގަނެފައިވާކަން ފުލުންގެ ތަހުގީގައް ހާމަވެފައިވުމުން މި މައްސަލައިގައި އޭނާ އާއި އިތުރު ބައެއްގެ މައްޗަށް ދައުވާކޮށްދޭން އެދި ޕްރޮސެކިއުޓާ ޖެނެރަލްގެ އޮފީހަށް ވަނީ ފޮނުވައިފައެވެ.
މި މައްސަލައިގައި މިހާރު ދައުވާ ކުރަން ފޮނުވާފައިވާނީ ބައްސާމުގެ ނަމުގައި އަމިން އެވެނިއު އޭ 1205 އަދި އޭ 1206 ދެ އެޕާޓްމެންޓަށް ފައިސާ ދެއްކުމުގައި އެފްއޭއެމްގެ ފައިސާ ބޭނުން ކޮށްފައިވާ މައްސަލައެވެ.
