ރާއްޖެ އެތެރެކުރަން އުޅުނު 7 މިލިޔަން ރުފިޔާގެ މަސްތުވާތަކެތި އަތުލައިގެންފިއެވެ.
މޯލްޑިވްސް ކަސްޓަމްސް އިން މިއަދު ހާމަކުރި ގޮތުގައި ރާއްޖެ އައި ފަސިންޖަރެއްގެ ލަގެޖުންނާއި ޕޯސްޓް މެދުވެރިކޮށްގެން ރާއްޖެ އެތެރެކުރަން އުޅުނު ޖުމުލަ 3.48 ކިލޯގްރާމްގެ މަސްތުވާތަކެތި އަތުލައިގެންފައިވާކަމަށެވެ.
އެގޮތުން ރާއްޖެ އައި ފަސިންޖަރަނީ މި މަހުގެ 5 ވަނަ ދުވަހު ބްރެޒިލް އިން ރާއްޖެއައި 33 އަހަރުގެ އަންހެނެއް ކަމަށާއި އޭނާގެ ލަގެޖުގައި ފޮރުވައިގެން އެތެރެކުރި މަސްތުވާތަކެތި ކަމަށް ޝައްކުކުރެވޭ އެއްޗެއް ހުރިކަން ޝައްކުކުރެވިގެން ބަލައި ފާސްކޮށްފައިވާކަމަށެވެ.
އަދި އެ ލަގެޖު ބަލައި ފާސްކުރި އިރު އެއިން ފެނު ތަކެތިން ހެދުނު އިތުރު ތަހުލީލުތަކުން އެއީ މަސްތުވާތަކެތީގެ ބާވަތެއް ކަމަށްވާ ކޮކެއިންކަން އެނގިފައިވާކަމަށްވެސް ކަސްޓަމުން ބުނެއެވެ.
މިތަކެތީގެ ބަރުދަނުގައި ޕެކިންއާއި އެކު ޖުމްލަ 2.44 ކިލޯގްރާމް ހުރިއިރު، މިތަކެތީގެ މަގުމަތީ އަގު ހަ މިލިއަނަށް ވުރެ ގިނަ ދިވެހި ރުފިޔާކަމަށް ލަފާކުރެވޭ ކަމަށްވެސް ކަސްޓަމްސްއިން ހާމަކުރެއެވެ.
މީގެ އިތުރުން އޮކްޓޯބަރު 7 ވަނަ ދުވަހު ޕޯސްޓް މެދުވެރިކޮށް ރާއްޖެ ގެނެސްފައިވާ ޕެކޭޖެއް ބަލާ ފާސްކުރިއިރު، އެ ޕެކޭޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާއިރު އެތަކެތީގެ ތަހުލީލުތައް ހެދުމުން އެއީ މަސްތުވާތަކެތީގެ ބާވަތެއް ކަމަށްވާ ހެރޮއިންކަން އެނގިފައިވާކަމަށާއި އޭގެ ބަރުދަނުގައި ޖުމްލަ 1.04 ކިލޯގްރާމް އަދި ވަގުތީއަގު މިލިއަނަށް ވުރެ ގިނަ ދިވެހި ރުފިޔާއަށް އަރާކަމުގައިވެސް ކަސްޓަމުން ވަނީ ބުނެފައެވެ.
އަދި މި މައްސަލަތައް އިތުރަށް ތަހްގީގު ކުރުމަށް، އަތުލައިގަނެވުނު މަސްތުވާތަކެއްޗާއި، ބްރެޒިލްގެ ފަސިންޖަރު އަދި ޕޯސްޓް ޕެކޭޖު ބަލާ ކަސްޓަމްސްއަށް އައި، 40 އަހަރުގެ ދިވެހި ފިރިހެނެއް މިހާރު ފުލުހުންނާއި ހަވާލުކޮށްފައިވާ ކަމަށްވެސް ކަސްޓަމްސްއިން ހާމަކޮށްފައިވެއެވެ.
