ރާއްޖޭގައި ވޭޕް މަނާކުރަން ނިންމުމުން ރައީސް ޑރ. މުހައްމަދު މުއިއްޒު ދެކެ މުޅި ގައުމު ފަހުރުވެރިވާނެ ކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
ރައީސް މިއަދު އެކްސްގައި ކުރެއްވި ޕޯސްޓެއްގައި ވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ މަހުގެ 15 އިން ފެށިގެން މަނާކުރުމަށް ނިންމާފައިވާކަން އިއުލާންކުރައްވާފަ އެވެ.
މީގެއިތުރުން، ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭބެހުން އަންނަ މަހުގެ 15 އިން ފެށިގެން މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގާފައިވާ ކަމަށް ރައީސް ވަނީ ވިދާޅުވެފައެވެ.
“ރައީސް މުއިއްޒަށްޓަކައި މުޅި ގައުމު ފަހުރުވެރިވާނެ،” އާދަމް ޝަރީފް ވިދާޅުވި އެވެ.
މިއާއިގުޅިގެން އާދަމް ޝަރީފް ވިދާޅުވީ ވޭޕް ކުރުން މަނާކުރުމަށްޓަކައި ރައީސް މުއިއްޒު ނިންމެވި ނިންމެވުމަކީ ރާއްޖޭގެ މުސްތަގުބަލު ސަލާމަތް ކުރެއްވުމަށް އެޅުއްވި ވަރަށް ހިކުމަތްތެރި އަދި އޭގެ އަގު މުޅި އުމުރަށް ދިވެހި ގައުމު ވަޒަން ކުރާނެ ނިންމެވުމެއް ކަމަށެވެ.
ރާއްޖޭގައި ވޭޕް މަނާކުރުމަށް ރައީސް ނިންމެވި ނިންމުމާއި ގުޅިގެން ގިނަ ބަޔަކު ވަނީ ރައީސްއަށް މަރުހަބާ ދަންނަވާފައެވެ.
