ވެލާނާ އިންޓަނޭޝަނަލް އެއާޕޯޓުގައި އެންމެ ފުރަތަމަ ބޭނުން ކުރި ރަންވޭ މަރާމާތު ކުރަން ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ހަވާލުކޮށްފިއެވެ.
މިހާރު ޓެކްސީވޭގެ ގޮތުގައި ބޭނުންކުރާ އެތަން މަރާމާތުކުރުމަށް ވެވުނު އެއްބަސްވުމުގައި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. އަދި ބީޔޫސީޖީގެ ފަރާތުން ސޮއިކުރެއްވީ އެކުންފުނީގެ ޖެނެރަލް މެނޭޖަރ ލުއޯ ވޭއިއެވެ.
މިއެއްބަސްވުމުގެ ދަށުން ރަންވޭ މަރާމާތު ކުރުމުގެ މަސައްކަތް 2027 ވަނަ އަހަރުގެ މެދުތެރޭ ފުރިހަމަކޮށް ނިމޭއިރު، ރަންވޭގައި 3،200 މީޓަރު ހުންނާނެއެވެ. މީގެއިތުރުން މިރަންވޭ ތަރައްޤީ ކުރެވިގެންދާނީ ޕެރެލަލް ޓެކްސީވޭއެއްގެ ގޮތުގައި ޒަމާނީ ފެންވަރަށެވެ.
މިމަސައްކަތަކީ ވެލާނާ އިންޓަނޭޝަނަލް އެއާޕޯޓު ތަރައްގީކުރުމަށް މިއަހަރުގެ ޖެނުއަރީ މަހު އިފްތިތާހު ކުރި ބިޔަ މަޝްރޫއުގެ ދަށުން ކުރިއަށްގެންދާ މަސައްކަތެކެވެ. އެމްއޭސީއެލް އިން ހާމަކޮށްފައިވާ ގޮތުގައި ވީއައިއޭ ތަރައްޤީ ކުރުމުގެ ބިޔަ މަޝްރޫއު ނިމިގެންދާއިރު ވީއައިއޭ އިން އަހަރަކު 25 މިލިއަން ފަސިންޖަރުންނަށް ޚިދުމަތް ދެވޭނެއެވެ.
