ވޭޕްކުރުމާއި ވޭޕްކުރުމަށް ބޭނުންކުރާ ތަކެތި ރާއްޖެ އެތެރެކުުރުމާއި ރާއްޖޭގައި ބޭނުންކުރުން މަނާ ކުރުމަށް ރައީސް ޑރ މުހައްމަދު މުޢިއްޒު ނިންމެވި ނިންމުމަށް (ޑަބްލިއުއެޗްއޯ)އިން މަރުހަބާ ކިޔައި ރާއްޖެއަށް ތައުރީފުކޮށްފިއެވެ.
އެގޮތުން ވޭޕްކުރުމާއި ވޭޕްކުރަން ބޭނުންކުރާ ތަކެތި އެތެރެކޮށް އެތަކެތީގެ ވިޔަފާރީ ރާއްޖޭގައި ކުރުން މަނާކުރުމަށް ނިންމަވައި މިދިޔަ ހޯމަ ދުވަހު ރައީސް ޑރ މުޙައްމަދު މުޢިއްޒު އެކަން ކަމާބެހޭ އިދާރާތަކަށް އެންގުމާއި ގުޅިގެން ޑަބްލިއުއެޗްއޯ – ސައުތު-އީސްޓް އޭޝިއާއިން އެކްސްގައި ކުރި ޕޯސްޓެއްގައި ރާއްޖެއިން ނިންމި ނިންމުމަށް މަރުހަބާ ކިޔައި ބުނެފައިވަނީ، ވޭޕްކުރުން މަނާކުރުމަށް ރާއްޖެއިން ނިންމި ނިންމުމަކީ، ޒުވާން އުމުރުގެ ކުދިންގެ މެދުގައި ވޭޕްކުރުން އިތުރުވުން ހުއްޓުވުމަށް އެޅިގެން ދިޔަ މުހިއްމު ފިޔަވަޅެއް ކަމަށެވެ.
އެގޮތުން 2019 ވަނަ އަހަރުގެ ‘ގްލޯބަލް ޔޫތު ޓޮބެކޯ ސާވޭ’އިން ދައްކާ ގޮތުގައި ރާއްޖޭގައި 13 އަހަރާއި 15 އަހަރާ ދެމެދުގެ 23.1 އިންސައްތަ ފިރިހެން ކުދިންނާއި 10.7 އިންސައްތަ އަންހެން ކުދިން ވަނީ އީ-ސިނގިރޭޓް ބޭނުންކުރާ ކަމަށް ދައްކާފައިވާކަމަށް އެ ޕޯސްޓްގައި ވަނީ ބުނެފައެވެ.
ވުމާއެކު، ދުންފަތުގެ އިސްތިއުމާލުކުރުމުގެ ހުރިހާ ވައްތަރަކީ ވެސް ގެއްލުންހުރި އަދި ގައިންގަޔަށް ނާރާ ބަލިތަކުގެ ތެރޭގައި ކެންސަރާއި ހިތުގެ ބަލިތަކާއި ފުއްޕާމޭގެ ދާއިމީ ބަލިތަކާއި ހަކުރު ބަލީގެ ނުރައްކާ ބޮޑު ކަން ފާހަގަކޮށް އެ އޯގަނައިޒޭޝަނުން ބުނެފައިވަނީ، ދެކުނު އިރުމަތީ އޭޝިއާ ސަރަހައްދުގެ ޒުވާނުންގެ މެދުގައި އީ ސިނގްރެޓްގެ ބަވަތްތައް ބޭނުންކުރާ މިންވަރު އިތުރުވެގެން ދާ ދިއުމަކީ ކަންބޮޑުވާންޖެހޭ ކަމެއް ކަމަށެވެ.
https://x.com/WHOSEARO/status/1846149298741727448
އެހެން ނަމަވެސް ދުންފަތުގެ އިސްތިއުމާލުކުރުމާ ދެކޮޅަށް މެންބަރު ގައުމުތަކުން ކުރަމުން އަންނަ މަސައްކަތުގެ ސަބަބުން، ދުންފަތުގެ އިސްތިއުމާލުކުރުން އެންމެ ރަނގަޅަށް ކޮންޓްރޯލް ކޮށްފައިވަނީ ދެކުނު އިރުމަތީ އޭޝިއާ ސަރަހައްދުގައި ކަން ފާހަގަކޮށް، ޑަބްލިއުއެޗްއޯއިން އިތުރަށް ބުނެފައިވަނީ ރާއްޖެ މި ހިމެނިގެން ދިޔައީ މުޅި ދުނިޔޭގައިވެސް އީ-ސިނގިރޭޓް މަނާކޮށްފައިވާ ހަމައެކަނި 37 ޤައުމުގެ ތެރޭގައި ކަމަށެވެ.
ރައީސް ވަނީ ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން އަންނަ މަހުގެ 15 ފެށިގެން މަނާ ކުރުމަށް އަންގަވާފައިވާ ކަމަށް ވިދާޅުވެފައެވެ.
ރައީސްގެ މި ނިންމެވުމާއެކު ގިނަ ފަރާތްތަކެއް، ޚާއްސަކޮށް ތަޢުލީމީ ދާއިރާގައި މަސައްކަތް ކުރައްވާ ފަރާތްތަކާއި ގިނަ ޑަކްޓަރުންނެއް އަންނަނީ މި ނިންމެވުމަށް ތަޢުރީފް ކުރަމުންނެވެ.
