ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ ހައްލުކުރުމަށް ހޯމްލޭންޑް މިނިސްޓްރީން ކުރިއަށް ގެންދާ “ކުރަނގި” އޮޕަރޭޝަންގެ ދަށުން މިހާތަނަށް 4،000 އަށް ވުރެ ގިނަ މީހުންގެ ބަޔޮމެޓްރިކް ޑާޓާ އެއްކޮށްފިއެވެ.
މިއަހަރުގެ މެއި މަހުގެ 2 ގައި ފަށާފައިވާ މިއޮޕަރޭޝަން މިހާރު މުޅި ރާއްޖެއަށް ފުޅާކޮށްގެން ކުރިއަށް ގެންދިއުމަށް މިނިސްޓްރީން ކަނޑައެޅުމަށްފަހު މިހާރު 45 ރަށެއްގައި ވަނީ މިއޮޕަރޭޝަން ފަށާފައެވެ. އަދި 8 ރަށެއްގައި ތިބި ހުރިހާ ބިދޭސީންގެ މައުލޫމާތު ވަނީ ނަގާފައެވެ. އެގޮތުން ޖުމްލަ 4272 ބިދޭސީއެއްގެ ބަޔޮމެޓްރިކް ޑާޓާ ވަނީ އެއްކޮށްފައެވެ.
ބިދޭސީންގެ މައުލޫމާތުތައް މިހާތަނަށް އެއްކުރި ރަށްތަކާއި އަދަދު:
- ހއ. ދިއްދޫން 390 ބިދޭސީން
- ރ. އަލިފުށިން 178 ބިދޭސީން
- ރ. ދުވާފަރުން 140 ބިދޭސީން
- ކ. ގާފަރުން 105 ބިދޭސީން
- ކ. ހިންމަފުށިން 701 ބިދޭސީން
- ކ. މާފުށިން 1،076 ބިދޭސީން
- ލ. ގަމުން 200 ބިދޭސީން
- އައްޑޫ ހިތަދޫން 114 ބިދޭސީން
މި ޕްރޮގްރާމުގެ ދަށުން ބިދޭސީ މަސައްކަތްތެރިންގެ މައުލޫމާތު އެއްކޮށްފައިވީ ނަމަވެސް މިނިސްޓްރީގެ މަޤުސަދަކީ އެފަރާތްތަކުގެ މައްޗަށް ފިޔަވަޅު އެޅުން ނޫންކަމަށް މިނިސްޓްރީން ބުނެފައިވެއެވެ.
މިނިސްޓްރީން ހާމަކޮށްފައިވާ ގޮތުގައި މިމަރުހަލާގައި ޤަވާއިދާ ޚިލާފަށް އުޅޭ ބިދޭސީންގެ ތެރެއިން ޤަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެފުރުސަތު ފަހިކޮށް ދެވިގެންދާނެއެވެ. އަދި އެއަށްފަހު ފުރަތަމަ މަރުހަލާ ނިމުމުން ރަސްމީ ލިޔެކިޔުން ނެތި، ޤަވާއިދާއި ޚިލާފަށް އުޅޭ ބިދޭސީންގެ ބަޔޯމެޓްރިކް އައިޑެންޓިފިކޭޝަނެއް ހަދައި، ޤައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލެވިގެންދާނެއެވެ.
