ހުޅުމާލޭ ދެވަނަ ފިޔަވަހީގެ އިންޓަގްރޭޓެޑް ޓޫރިޒަމް ޒޯން، އާބަން އައިލްގައި މަތީފަންތީގެ ތިން ހޮޓެލް ތަރައްޤީކުރާނެ ފަރާތެއް ހޯދުމަށް އިއުލާންކޮށްފިއެވެ.
އެޗްޑީސީން ހާމަކުރި ގޮތުގައި، މިހޮޓެލްތަކަކީ، އެންމެ ޒަމާނީ ވަސީލަތްތަކާއެކު ފެންވަރު ރަނގަޅު ޚިދުމަތް ދެވޭ ގޮތަށް އަދި ރާއްޖެއަށް ޒިޔާރަތްކުރާ ފަތުރުވެރިންނަށް ޚާއްސަކޮށްގެން ތަރައްގީކުރާ މަތީ ފަންތީގެ ހޮޓެލްތަކެއް ކަމަށާއި މިހޮޓެލްތައް ތަރައްޤީކުރުމަށް ދޫކުރާއިރު އިސްކަންދޭނީ ލޭންޑް ލީސް މޮޑެލްއަށްކަމަށެވެ.
އެހެންނަމަވެސް މިކަމަށް ޝައުގުވެރިވާ ފަރާތްތަކުން އެކްސްޕްރެޝަން އޮފް އިންޓްރެސްޓް، އީއޯއައި ހުށަހަޅާއިރު، ލޭންޑް ލީސް މޮޑެލް ނޫން އެހެން މޮޑެލްތަކަށް ވެސް އީއޯއައިތައް ހުށަހެޅިދާނެކަމަށް އެޗްޑީސީން ބުނެއެވެ.
މީގެއިތުރުން އެޗްޑީސީން ހާމަކޮށްފައިވާ ގޮތުގައި އެއް ފަރާތަށްވުރެ ގިނަ ފަރާތުން ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ މަޝްރޫއު ހަވާލު ކުރާނީ، އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކަށްކަމަށާއި އީއޯއައިތައް އިވެލުއޭޓް ކުރުމުގައި ބަލާނެ ކަންތައްތަކުގެ ތެރޭގައި ޕްރޮޕޯސްކޮށްފައިވާ ބިޒްނަސް މޮޑަލްއާއި، އޮޕަރޭޓަރުގެ ތަޖްރިބާ ހިމެނެއެވެ.
އެހެންކަމުން މިކަމަށް ޝައުޤުވެރިވާ ފަރާތްތަކުން އީމެއިލް މެދުވެރިކޮށް މި މަހުގެ 29 ވަނަ ދުވަހުގެ 14:00 ގެ ކުރިން އެޗްޑީސީއަށް އީއޯއައި ހުށަހެޅުމަށާއި އީއޯއައި ހުށަހަޅާނީ އީމެއިލް މެދުވެރިކޮށް، business@hdc.mv ކަމަށް އެޗްޑީސީން ބުނެފައިވެއެވެ.
