މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ސްކޫލްތަކުގެ ދަރިވަރުންނަށް ޚާއްސަކޮށްގެން ކެރިއަށް ގައިޑެންސް ޕްރޮގްރާމެއް ފަށައިފިއެވެ.
އެމްއޭސީއެލް އިން ބުނެފައިވާ ގޮތުގައި “އެމް.އޭ.ސީ.އެލް ކެރިއަރ 2024” ގެ ނަމުގައި ކުރިއަށް ގެންދާ މިޕްރޮގްރާމްގައި އެމް.އޭ.ސީ.އެލްގައި ހުރި ވަޒީފާގެ ފުރުސަތުތަކަށް ސްކޫލްތަކުގެ ދަރިވަރުން ހޭލުންތެރި ކުރެވިގެންދާނެއެވެ.
މި ޕްރޮގަރްމްގެ އަމާޒަކީ، އޭވިއޭޝަން ދާއިރާގެ އިތުރުން އެއަރޕޯޓް އޮޕަރޭޝަންސްގައި ހުރި ވަޒީފާގެ ފުރުސަތުތަކާ ގުޅޭ މައުލޫމާތު ދަރިވަރުންނަށް ފޯރުކޮށްދީ، ދަރިވަރުންނަށް އެ ކުދިންގެ މުސްތަޤުބަލާއި މެދު ވިސްނުންތެރިކަމާއެކު ނިންމުންތައް ނިންމުމަށް އެހީތެރިވުން ކަމުގައި އެމްއޭސީއެލް އިން ބުނެފައިވެއެވެ.
މި ޕްރޮގްރާމްގެ ދަށުން ބޭއްވުނު ފުރަތަމަ ފެއަރ މިއަދު ޣާޒީ ސްކޫލުގައި ކުރިއަށް ގެންގޮސްފައިވާއިރު، ޕްރޮގްރާމް ފެށުމުގެ ރަސްމިއްޔާތުގައި އެމް.އޭ.ސީ.އެލްގެ ސީ.އީ.އޯ އަދި މެނޭޖިންގ ޑިރެކްޓަރ އިބްރާހިމް ޝަރީފް މުޙައްމަދު، ޑެޕިއުޓީ މެނޭޖިންގ ޑިރެކްޓަރ މުޙައްމަދު ލައްމާން، ޑެޕިއުޓީ މެނޭޖިންގ ޑިރެކްޓަރ މުޖުތަބާ ލަތީފުގެ އިތުރުން އެމް.އޭ.ސީ.އެލްގެ އިސްވެރިން ވަނީ ބައިވެރިވެ ވަޑައިގެންފައެވެ. މީގެއިތުރުން، ޣާޒީ ސްކޫލްގެ ފަރާތުން، ޕްރިންސިޕަލް ބަޝީރާ މުޙައްމަދު އަދި ސްކޫލްގެ އިސްބޭފުޅުން ވެސް ވަނީ ބައިވެރިވެވަޑައިގެންނެފައެވެ.
މި ރަސްމިއްޔާތުގައި ވާހަކަދައްކަވަމުން އެމް.އޭ.ސީ.އެލްގެ ސީ.އީ.އޯ ޝަރީފް ވިދާޅުވީ ޓެކްނިކަލް ގޮތުން ގާބިލު ދިވެހިން ބިނާކުރުމަކީ އެމް.އޭ.ސީ.އެލްގެ އަމާޒެއް ކަމަށާއި ސްކޫލް މަރުހަލާ ނިންމާ ދަރިވަރުންނަށް އެމް.އޭ.ސީ.އެލް ފަދަ ކުންފުންޏަކުން ހުޅުވިފައިވާ ފުރުސަތުތައް އެނގުމަކީ މުހިންމު ކަމެއް ކަމަށެވެ.
އެހެން ގިނަ އެއަރޕޯޓުތަކާއި ޚިލާފަށް ވެލާނާ އިންޓަރނޭޝަނަލް އެއަރޕޯޓަކީ ވަކި ރަށެއްގައި ހިންގާ އެއަރޕޯޓެއްކަން ފާހަގަ ކުރައްވަމުން އެމް.ޑީ ވިދާޅުވީ، މި ރަށަކީ އެއަރޕޯޓް އޮޕަރޭޝަންސްގެ އިތުރަށް ވަރަށް ގިނަ މުނިސިޕަލް ޚިދުމަތްތަކާއި އެހެނިހެން ދާއިރާތަކެއްވެސް ހުރި ތަނެއް ކަމަށެވެ. އަދި ގިނަ އިންޑަސްޓްރީތަކެއްގައި މަސައްކަތް ކުރުމުގެ މަގު ފަހިވެފައި އޮތް ކުންފުންޏެއް ކަމަށާއި، ކުންފުނީގެ ހުރިހާ ވަޒީފާއެއްގައި ދިވެހިން މަސައްކަތް ކުރަމުންދާތަން ފެނުމަކީ އުއްމީދު ކުރައްވާ ކަމެއް ކަމަށެވެ.
މިރަސްމިއްޔާތުގައި ވާހަކަދައްކަމުން ޣާޒީ ސްކޫލްގެ ޕްރިންސިޕަލް ބަޝީރާ ވިދާޅުވީ، ދަރިވަރުން ސްކޫލް ނިންމާއިރު އެކުދިންނަށް ވަޒީފާގެ ބާޒާރުގައި ހުރި ފުރުސަތުތައް އެނގިގެން ދިއުމަކީ މުހިންމުކަމެއް ކަމަށާއި ސްކޫލްތަކާއި މުޖުތަމައުއާއި ދެމެދު އޮންނަ ގުޅުމަކީ ވަރަށް މުހިންމު ގުޅުމެއް ކަމަށެވެ. އަދި އެމް.އޭ.ސީ.އެލް ކަހަލަ ބޮޑު ކުންފުންޏަކުން މިފަދަ ހަރަކާތެއް ބޭއްވުމަކީ އެ ކުންފުނިން ގައުމު ބިނާކުރުމަށް ކުރާ މަސައްކަތް ދައްކުވައިދޭ ކަމެއް ކަމަށެވެ.
އެމްއޭސީއެލް އިން ހާމަކޮށްފައިވާ ގޮތުގައި މި ޕްރޮގްރާމް ކުރިއަށް ގެންދިއުމަށް ހަމަޖެހިފައި ވަނީ 2 ސެޝަނަކަށް ބަހާލައިގެންނެވެ. އަދި ކޮންމެ ސެޝަންއެއްގައި ލަކީޑްރޯއެއް ނެގުމަށް ހަމަޖެހިފައިވާއިރު، ލަކީޑްރޯއިން ހޮވޭ 20 ދަރިވަރުންނަށް އެމް.އޭ.ސީ.އެލްގެ މަސައްކަތްތައް ގާތުން ބަލާލުމުގެ ފުރުސަތު ލިބިގެން ދާނެއެވެ. އަދި ފެއަރ ކުރިޔަށްދާ ވަގުތު ގުރުއަތުން ހޮވޭ 10 ދަރިވަރަކަށް ހަދިޔާ ލިބިގެންދާނެ ކަމަށް ވެސް އެކުންފުނިން ބުނެފައިވެއެވެ.
