ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމުގެ ވެރިކަމުގައި އެޅި، މިހާތަަނަށް ރާއްޖޭގައި ހިންގުމު އުމްރާނީ އެންމެ ބޮޑު މަޝްރޫޢުކަމުގައިވާ ސިނަމާލެ ބްރިޖްގެ މަޢުލޫމަތުތައް ހިމެނޭހެން ސިނަމާލެ ބްރިޖް މޮނިއުމަންޓް ޕާކެއް ހުޅުވައިފިއެވެ.
އިއްޔެ ބޭއްވި ރަސްމިޔާތެއްގައި މި ޕާކު ހުޅުއްވައިދެއްވީ، އިންފްރާސްޓްރަކްޗަރު މިނިސްޓަރު ޑރ. އަބްދުﷲ މުއްތަލިބާއި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވާންގް ލިޒިންއެވެ.
މި ޕާކު ހުޅުއްވުމަށްފަހު މިނިސްޓަރ މުއްތަލިބް ވިދާޅުވީ، މި ޕާކުގައި ބްރިޖް ޤާއިމްކުރި ދުވަސްވަރުގެ މަސައްކަތްތައް ހިމެނޭ ފޮޯތަކާއި އަދި އެތަނުގެ ތެރޭގައި މަޑުކޮށްލައިގެން ތިބޭނެ ތަންތަނުގެ އިތުރުން ބްރިޖާއި ގުޅުންހުރި މުހިއްމު މައުލޫމާތުތައް ބްރިޖްގެ މޮނިއުމަންޓުން ލިބެން ހުންނާނެކަމަށެވެ. އެގޮތުން މި ބްރިޖަކީ، ޗައިނާގެ ބޮޑު ހިލޭ އެހީއެއްގެ ދަށުން ހިންގުނު މަޝްރޫޢަކަށްވާތީ، އެފަދަ މަޢުލޫމާތުތައް ދިވެހިންނަށްވެސް އެނގުމަކީ މުހިއްމުކަމެއް ކަމުގައި މިނިސްޓަރު ފާހަގަ ކުރެއްވިއެވެ.
މީގެ އިތުރުން ސިނަމާލެ ބްރިޖަކީ ރާއްޖެއާއި ޗައިނާއާއި ދެމެދުގައި އޮތް ގުޅުމުގެ ރަމްޒެއްކަމުގައި ފާހަގަކުރައްވައި، ޗައިނާ ސަފީރު ވިދާޅުވެފައިވަނީ، ބްރިޖުގެ ސަބަބުން މާލެ ސަރަހައްދާއި ރާއްޖޭގެ އިޤްތިސާދަށް ވެސް ބޮޑެތި ފައިދާތަކެއް ކުރަމުންދާ ކަމަށެވެ.
ޕާކް ހުޅުވުމުގެ ރަސްމިއްޔާތުގައި ވަރަށް ގިނަ ކުޑަކުދިން ވަނީ ބައިވެރިވެފައެވެ.
