މަސްތުވާތަކެތީގެ ބާވަތެއްކަމަށްވާ ހެރޮއިން ގިނަ އަދަދަދަކަށް ރާއްޖެ އެތެރެކުރަން އުޅެނިކޮށް ހައްޔަރުކުރި އިންޑިޔާ ދެމަފިރިންގެ ބަންދަށް 15 ދުވަސް ކްރިމިނަލް ކޯޓުން ޖަހައިފިއެވެ.
މި މަހުގެ 16 ވަނަ ދުވަހު ހައްޔަރުކުރި މި ދެމަފިިރިންގެ ތެރޭގައި ހިމެނެނީ، އުމުރުން 41 އަަހަރުގެ ފިރިހެނަކާއި އުމުރުން 38 އަހަރުގެ އަންހެނެކެވެ.
މި ދެމީހުން ވެލާނާ އިންޓަރނޭޝަނަލް އެއަރޕޯޓުން ހައްޔަރުކޮށްފައިވަނީ، އެމީހުން ގެނައި ލަގެޖު ތެރޭގައި ފޮރުވައިގެން ރާއްޖެއަށް އެތެރެކުރަން އުޅެނިކޮށް އަތުލައިގެން 2.05 ކިލޯގެ ހެރޮއިން އާއެކުއެވެ.
މި ދެމީހުންގެ ބަންދާއި މެދު ގޮތެއް ނިންމުމަށް އޭރު ކޯޓަށް ހަޒިރުކުރުމުން ކްރިމިނަލް ކޯޓުން ވަނީ، އެ ދެމީހުންނަށް ތަރުޖަމާނަކު ހަމަޖެހިފައި ނުވުމުން ދެމީހުން 3 ދުވަހަށް ބަންދު ކުރުމަށް އަމުރުކޮށްފައެވެ.
އެ މުއްދަތު ހަމަވެ އަނެއްކާވެސް އެ ދެމަފިރިންގެ ބަންދާއި މެދު ގޮތެއް ކަނޑައެޅުމަށް ކްރިމިނަލް ކޯޓަށް ހާޒިރުކުުރުމުން އެ ކޯޓުން ވަނީ، ދެ މީހުން ވެސް ބަންދުން ދޫކޮށްލައިފި ނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ބެލެވޭތީއާއި ކުށުގެ ތުހުމަތުކުރެވޭ ވަރަށް ހެކި ހުށަހަޅާފައިވާތީ އެ ދެމަފިރިންގެ ބަންދުގެ މުއްދަތު އިތުރުކޮށް ބަންދަށް 15 ދުވަސް ޖަހައިފައެވެ.
މި މީހުންގެ މައްޗަށް ކުރެވޭ ތުހުމަތުތަކަށް އިންކާރުކޮށް ޝަރީޢަތުގައި އެ ދެމަފިރިން ބުނެފައިވަނީ، އެ ތަކެއްޗަކީ އެ މީހުންނާއި މީހަކު ހަވާލުކުރި އެއްޗިހިކަމަށާއި އޭގައި ފޮރުވާފައި އެއްޗެއް ހުރިކަމެއް އެނގިފައި ނުވާކަމަށެވެ.
