ބެންކޮކުން ރާއްޖެ އައި ދިވެއްސެއްގެ ލަގެޖުން ފެނުނު 3 މިލިޔަން ރުފިޔާގެ ޑްރަގާއެކު އޭނާ ހައްޔަރުކޮށްފިއެވެ.
މޯލްޑިވްސް ކަސްޓަމްސް ސަރވިސްއިން ވިދާޅުވީ، މި ތަކެތި އަތުލައިގެންފައިވަނީ އިއްޔެގެ ވަގުތެއްގައި ބެންކޮކުން ރާއްޖެ އައި 33 އަހަރުގެ ދިވެހި ފިިރިހެނެއްގެ ލަގެޖުން ކަމަށެވެ.
އެގޮތުން އޭނާގެ ލަގެޖުގައި މަސްތުވާތަކެތިކަމަށް ޝައްކު ކުރެވޭ އެއްޗެއް ހުރިކަމަށް ތުހުމަތުކުރެވިގެން އިތުރަށް ބަލައި ފާސްކޮށްގެން އެ ލަގެޖުން ފެނުނު ތަކެތީގެ ފުރަތަމަ މަރުހަލާގެ ތަހުލީލުތަކުން އެ ތަކެތި، މަސްތުވާތަކެތީގެ ބާވަތެއްކަމަށްވާ މެފެޑްރޯނަށް ފައްސިވެފައިވާކަމަށް ކަސްޓަމްސްއިން ވަނީ ބުނެފައެވެ.
މީގެ އިތުރުން ކަސްޓަމްސްއިން ހާމަކުރި ގޮތުގައި ޖުމުލަ ބަރުދަނުގައި 1.86 ކިލޯ ހުރި އެ ތަކެތީގެ މަގުމަތީ އަގު 3,348,000.00 ރުފިޔާއަށް އަރާނެ ކަމަށް ލަފާކުރެވޭ ކަމަށެވެ.
މިކަމާއި ގުޅިގެން ފުލުހުން އަދި ވަކި އެއްޗެއް ހާމަކޮށްފައި ނުވާއިރު، ކަސްޓަމްސް އިން ބުނެފައިވަނީ އަތުލައިގަނެވުނު މަސްތުވާތަކެތި، އެތަކެތި އަތުލައިގެން މީހާއާއެކު ފުލުުހުންނާއި ހަވާލުކޮށްފައި ވާކަމަށެވެ.
މި ފަހުން އައިސް ރާއްޖެއަށް މަސްތުވާތަކެތި އެތެރެކުރަން އުޅެނިކޮށް އަތުލައިގަންނަ މިންވަރު އިތުރުވެފައިވާކަން ފާހަގަކޮށްލެވެއެވެ. އެގޮތުން މި މަހުގެ 16 ވަނަ ދުވަހު ރާއްޖެ އައި އިންޑިޔާގެ ދެމަފިރިއެއްގެ ލަގެޖުން ފެނުނު 2.05 ކިލޯގްރާމްގެ ހެރޮއިންއާއެކު ދެ ދެމަފިރިން ހައްޔަރުކޮށް އިއްޔެ ކްރިމިނަލް ކޯޓުން ވަނީ އެ ދެމީހުންގެ ބަންދަށް 15 ދުވަސް ޖަހައިފައެެވެ.
