މަސްތުވާތަކެތީގެ އިތުރުން ގިނަ އަދަދެއްގެ ފައިސާއާއެކު މާލެއިން 3 މީހަކު ހައްޔަރުކޮށްފިއެވެ.
މި މައްސަލައިގައި ފުލުހުން ހައްޔަރުކޮށްފައި ވަނީ، ލ. ކަލައިދޫ / އެވަރގްރީން، އުމުރުން 22 އަހަރުގެ މުޙައްމަދު އައިޝަރު ޔޫސުފްގެ އިތުރުން ކ. ކާށިދޫ / އަންދަލީބުގެ، އުމުރުން 19 އަހަރުގެ މުޙައްމަދު މައިހާން ފަޔާޒާއި ދ. ކުޑަހުވަދޫ / ރަނަކުރި، އުމުރުން 31 އަހަރުގެ އިބްރާހީމް މާޖިދެވެ.
މިކަމާ ގުޅިގެން ފުލުހުން ހާމަކޮށްފައިވާގޮތުގައި މި މީހުން ހައްޔަރުކޮށްފައިވަނީ، މަސްތުވާތަކެތި ގެންގުޅޭ ކަމަށްބުނެ މި މަހުގެ 19 ވަނަ ދުވަހު ފުލުހުންގެ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން ކޯޓު އަމުރެއްގެ ދަށުން މާލޭގެ ތިން ގެޔެއް ބަލައި ފާސްކޮށް ހިންގި އޮޕަރޭޝަނެއްގެ ތެރެއިން ކަމަށެވެ.
އެގޮތުން މި އޮޕަރޭޝަންގެ ތެރެއިން އެ ތިން މީހުންގެ ގެތައް ބަލައި ފާސްކޮށް ވަގުތީ ބަރުދަނުގައި 1142.04 ކިލޯ ހުރި މަސްތުވާތަކެތިކަމަށް ބެލެވޭ ތަކެތީގެ އިތުރުން 86000 އަށް ވުރެ ގިނަ ރުފިޔާ ފެނިފައިވާކަމަށް ފުލުހުން ބުނެފައިވެއެވެ.
އަދި މި މައްސަލައިގައި ހައްޔަރުރި ތިން މީހުން ބަންދުގައި ބޭތިއްބުމަށް ކްރިމިނަލް ކޯޓުން އަމުރުކޮށްފައިވާކަން ހާމަކޮށް ފުލުހުން ބުނެފައިވަނީ، އެ ކޯޓުން ނެރުނު އަމުރުގައި މުޙައްމަދު އައިޝަރު ޔޫސުފް 15 ދުވަހަށް އަދި ދެންތިބި ދެމީހުން 7 ދުވަހަށް ބަންދުކުރުމަށް އަންގައިފައިވާކަމަށެވެ.
މަސްތުވާތަކެތީގެ މައްސަލަތަކުގައި މީހުން ހައްޔަރުކުރާ މިންވަރު އިތުރުވެފައިވާއިރު މަސްތުވާތަކެއްޗާއި ދެކޮޅަށް ކުރަމުން އަންނަ މަސައްކަތްތައް އިތުރަށް ވަރުގަދަކުރާނެކަމަށް ހޯމް މިނިސްޓަރ މީގެ ކުރިން ވިދާޅުވެފައި ވެއެވެ.
މީގެ އިތުރުން މަސްތުވާތަކެތި ބޭނުންކުރާ މީހުންނަށް ދެވޭ ފަރުވާތައް ހަރުދަނާ ކުރުމުގެ ގޮތުން އެ ފަދަ މީހުންނަށް ހޮސްޕިޓަލްތަކުން ފަރުވާ ހޯދޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުން އަންނަ ކަމުގައި އިއްޔެ ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓްރީގެ ސްޓޭޓް މިނިސްޓަރ ލުބްނާ މުހައްމަދު ޒާހިރުވެސް ވަނީ ވިދާޅުވެފައެވެ.
