ހުޅުމާލޭގެ ދެވަނަ ފިޔަވަހިން ސިނާއީ ބޭނުމަށް ވިއްކާ ބިމުގެ ބޮޑުމިނާއި އަގު ކުޑަކޮށް، އަލުން އިއުލާންކޮށްފިއެވެ.
ހައުސިން ޑިވެލޮޕްމެންޓުން މިމަހުގެ ކުރީކޮޅު ހުޅުމާލެ ދެވަނަ ފިޔަވަހިން އިއުލާން ކުރި ބިންތަކުގެ ބޮޑުމިނާއި އަގު ކުޑަކޮށް އަލުން އިއުލާންކޮށްފައިވާއިރު، މިހާރު ބީލަން ފެށޭ އަގަކީ އަކަފޫޓަކަށް 5،500 ރުފިޔާއެވެ.
ކުރިން އެޗްޑީސީން އާއްމުކޮށްފައިވާ އިއުލާނުގައި ދެބޮޑުމިނެއްގެ ބިން ވިއްކުމަށް އިއުލާންކޮށްފައިވެއެވެ. އެއީ އެއީ 3،689 އަކަފޫޓުގެ ހަތަރު ބިމާއި 3،746 އަކަފޫޓުގެ އަށް ބިމެވެ. އެހެންނަމަވެސް މިހާރު އިއުލާނުކޮށްފައި ވަނީ 1،515 އަކަފޫޓުގެ ހަތަރު ބިމާއި 1،538 އަކަފޫޓުގެ 12 ބިން ވިއްކުމަށެވެ.
މިބިންތައް ވިއްކަން ހުޅުވާލައިފައި ވަނީ ހަމައެކަނި ދިވެހީންނަށެވެ. އެގޮތުން އުމުރުން 18 ވެފައިވާ ކޮންމެ ދިވެހި ރައްޔިތަކަށް ވެސް ބީލަން ހުށަހެޅޭނެ ކަމަށް އެޗްޑީސީން ބުނެފައިވެއެވެ. އަދި ކޮންމެ ފަރާތަކަށް ވެސް ޖުމުލަ ތިން ބިން ގަނެވޭނެ ކަމަށް އެކުންފުނިން ބުނެފައިވެއެވެ.
އެޗްޑީސީން ހާމަކޮށްފައިވާ ގޮތުގައި ކުންފުންޏަކުން ބީލަން ހުށަހަޅާނަމަ، އެ ކުންފުންޏަކީ ރާއްޖޭގައި ރަޖިސްޓްރީ ކޮށްފައިވާ 100 ޕަސަންޓު ދިވެހިންގެ ހިއްސާ އޮންނަ ކުންފުންޏެއް ކަމުގައި ވާން ޖެހޭނެއެވެ.
ދެ މަރުހަލާއަކަށް ބަހައިލައިގެން ބިން ވިއްކުން ކުރިއަށް ގެންދިއުމަށް ހަމަޖެހިފައިވާއިރު، ފުރަތަމަ މަރުހަލާއަކީ އެކްސްޕްރެޝަން އޮފް އިންޓަރެސްޓް (އީއޯއައި) ހުށަހެޅުން ކަމަށްވާއިރު ދެވަނަ މަރުހަލާއަކީ، ބިން ގަންނަން ހުށަހަޅާފައިވާ ފަރާތްތަކުން ބިޑް ކުރުން ކަމަށް އެޗްޑީސީން ބުނެފައިވެއެވެ.
އެޗްޑީސީން އިތުރަށް ބުނީ ބީލަންތައް ކުރިއަށްގެންދިއުމަށް ހަމަޖެހިފައި ވަނީ އެ ކޯޕަރޭޝަންގެ އޮންލައިން ބިޑް ޕޯޓަލް މެދުވެރިކޮށް ކަމަށާއި މިހާރު ވިއްކުމަށް ހުޅުވާލާފައިވާ ބިންތަކުގެ މައުލޫމާތު ބިޑް ޕޯޓަލް މެދުވެރިކޮށް ލިބެން ހުންނާނެ ކަމަށެވެ. އަދި މިކަމާއި ގުޅޭ ގޮތުން އިތުރު މައުލޫމާތު ސާފު ކުރަން ބޭނުންވާ ފަރާތްތަކުން އެކޯޕަރޭޝަނުގެ ހޮޓްލައިން ނަންބަރު 1516 އަށް ގުޅައިގެން ސާފުކުރެވޭނެ ކަމަށް ވެސް އެޗްޑީސީން ބުނެފައިވެއެވެ.
